Daily Newspaper

Arsenal in White la lut

8

London club lian Arsenal chuan hun rei tak chhung lak tuma an hel tawh Ben White chu an la lut fel thei ta nge nge a. Gunners Jersey No. 4 a ha ang.

Season liam taah beisei an phak loh em vangin Arsenal hian an squad an thuamchak mek a. An tlarhnung thuamthat ngai pawimawhin, White nen hian defender thar pahnih an la lut ta chiah. Brighton leh England full-back White hi manager Mikel Arteta player duhzawng tak mai a ni a. Brighton-a contract thar ziak hlimhlawl niin, amanah £50m zet sen ngai bawk mahse lak ngei an duh tlat a. Hun rei tak an umzui hnuin an la fel thei ta nge nge a ni.

England tan hial khel tura koh a ni a, club lian Arsenal meuh a zawm ta mai hi Ben White tan hmasawnna ropui tak a tling. Rawlthar a nih laiin Southampton chuan chhawr zui duh lovin an lo chhuah zalen tawp tawh a, hun chhe tak a hmang. Brighton & Hove albion hian an la lut a, an chhawr mai bik lo. Loan in Newport, Peterborough leh Leeds United lamah an tirchhuak leh zak zak. Leeds United atang hian a khel tha chho va, Brighton-ah hmun pawimawh a chan phah ta hial.

Brighton-ah a let leh hnuin a khel tha leh zual a, club lian hrang hrangte pawhin an hmutai tan. England tan khel tura koh a ni ta hial. Brighton hian club dang pana a chhuah mai an hlau a, kum kalta mai khan contract thar an ziahpui. Contract thar a ziahna la rei lo hle mahse Arsenal chuan £50m zet sengin an leichhuak ta tho tho a ni. Veteran defender David Luiz an chhuahtir vangin Gunners hian centre back an mamawh hle a, David Luiz-a jersey rochuntu White hi an tlarhnung ban rinawm anih ngei a beiseiawm.

Ben White hi Arsenal mi thar pathumna chiah a ni a, Anderlecht atangin midfielder Albert Sambi Lokonga an la lut tawh a, Benfica atangin left-back Nuno Tavares an la lut fel tawh bawk. Gunners hian season tharah khawng zawka kir an tum hle. English midfielder ball thiam James Maddison lak tumin hma an la mek a. Inter Milan leh Argentina stiker Lautaro Mar-tinez lak tumin hma an la mek bawk a. Season tharah chetthat an tum hle.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy