Site icon The Aizawl Post

Arsenal leh City hmabak

English Premier League (EPL) 2022-23 ah champion tumin Arsenal leh Manchester City te an inel fal mek a. Tun tumah hian Arsenal leh City te hmabak kan tarlang ang a, tu nge champion theihna hun nei tha zawk kan thlir kual thuak thuak ang.
Arsenal
Kum 2003-04 hnu lamah Premier League-a champion thei ta lo vang vang Arsenal hian an hnuai chiaha awm Manchester City lakah point riatin hma an hruai fal mek a, City ai hian vawikhatin an khel tam zawk thung. Mikel Arteta hnuaiah hmuhnawm taka inlan City hi season kal mekah rin phak bakin an khel tha a, beisei phak bakin an tlo ta viau bawk. Khelh hmabak 10 chauh an nei tawh chungin point 8 zetin hma an hruai fal a, an champion leh champion loh chu an kuta innghat liau liau a ni.
EPL champion ni turin Arsenal hian fiahna hautak tak an hmachhawn a la ngai dawn a, club lian pathum; Liverpool, Chelsea leh Manchester City te an la hmachhawn dawn. Liverpool leh City hi Mimual (away) ah an hmachhawn a ngai dawn a, hei hi an dinhmun tichhe zual theitu a ni thei a. Reds leh City lakah point an hmu thei a nih chuan an dinhmun titha lehzualtu a ni hlauh thei thung. Khelh hmabak 10 an la neihah hian an mualah vawi nga an inlan ang a, Mimualah vawi nga an inlan thung ang.
English top-flight ah hian khelh 28 atanga point 69 chunglam hmuh theih hi thil tha tak mai a ni a. English top-flight ah khelh 28 atanga point 69 chin hmu team 12 an lo awm tawh a. Team 12 zingah hian team 11 te an champion zui a. Team khat chiah champion zo lova, pahnihna ni ta an awm. Chu team chu Liverpool an ni a. Kum 2018-19 khan khelh 28 atangin point 69 hmu bawk mah se an champion zo lo. Season kal mekah Arsenal hian game 23 atangin point 69 an hmu mek a, EPL-ah an champion zui lo a nih chuan Liverpool hnung an zui chiah ang.
Arsenal in khelh hmabak an la neihte chu:
1 April – Leeds (H)
9 April – Liverpool (A)
16 April – West Ham (A)
21 April – Southampton (H)
26 April – Manchester City (A)
29 April – Chelsea (H)
6 May – Newcastle (A)
13 May – Brighton (H)
20 May – Nottingham Forest (A)
28 May – Wolves – (H)
Manchester City
EPL champion lai Manchester City hian vawi 27 khel tawhin point 61 an hmu mek a, hma-hruaitu an Arsenal an phak lohna hi point 8 a ni a. Gunners khelh zat khel a, an chak a nih bawk chuan an inkar hi point nga chuahin an sawr zim thei dawn. An elpui lian ber Arsenal hi Emirates Stadium-ah ngei an hneh tawh a, Etihad Stadium-a intum leh tur an nih vangin Arsenal hneh nawn theihna hun tha tak nei. An khelh hmabak 10 enin City hi an khingpuite an nem deuh zawk niin a ngaih theih a. Squad nei chhah zawk an ni bawk nen champion turin an dinhmun a tha viau niin a ngaih theih.
City hian International break zawha EPL an khelh hmasak berah Liverpool an hmachhawn dawn a. Liverpool an hneh a nih chuan champion theih beiseina sang zawk an nei dawn a. An mualah an tlawm hlauh a nih erawh chuan champion an beiseina a khawk thei viau dawn thung. City hmabak zingah Chelsea chu hautak deuh ber tura ngaih a ni a. Team lian pahnihte Liverpool leh Chelsea te hi Etihad Stadium-ah an mikhual ve ve dawn vangin an tan chak theih beiseina a sang phah ngei ang.
City goal thun khawl Erling Haaland chuan hliam vangin Norway training camp a chhuahsan a. Liverpool an hmachhawn hunah Haaland hi a inlan thei dawn em tih a la chiang lo. Haaland a tel thei lo a nih ngat chuan Liverpool tan thawkchhuaina tham a ni ngei ang.
City khelh hmasak 11 te:
1 April – Liverpool (H)
8 April – Southampton (A)
15 April – Leicester (H)
23 April – Brighton (A)
26 April – Arsenal (H)
30 April – Fulham (A)
6 May – Leeds (H)
13 May – Everton (A)
20 May – Chelsea (H)
28 May – Brentford (A)

Exit mobile version