Daily Newspaper

Arsenal midfielder thar Lokonga

7

Kum 21 mi lek ni chunga season liamtaa Anderlecht captain ni pha Albert Sambi Lokonga chuan Arsenal-ah long-term contract a ziak a, contract-in a awh chin tur leh a man hi tarlan ni chiah lo mah se British media-te chuan Anderlecht midfielder manah hian north London club chuan pound maktaduai 17.2 vel an seng niawmin an chhuah hlawm.

Belgium Under-21 international Lokonga hian kum 15 mi lek a nih laiin Anderlecht a zawm a, December 2017 khan a first-team debut nghakchhuakin, game 78-ah goal thum a thun tling.

Belgium Under-21s tan game sarih a khelh tawah goal hnih a thun tawh bawk.

Kum 21 mi Belgian mihang Lokonga hian hian a club tharah number 23 a ha dawn a, a kawr hnungah ‘Sambi’ tih nemkai a ni ang.

UK a thlawhluh hnuah a khawsakna tur ram sawrkar inkaihhruaina zawmin Lokonga hi a inkhunghrang mek a, quarantine hun a hman zawh rualin a team-mate thar turte hi a zawm ve tawh dawn a ni.

Arsenal boss Mikel Arteta chuan a midfielder thar fakin, “Albert hi player fing zet niin, heti zat lek kumah ei a tling der tawh tih a pholang tawh.

“Anderlecht-ah khan Vincent Kompany leh a team hnuaiah uluk taka hrual niin, Vincent nen pawh kan inhre tha a, Albert hi ka beng hriatah a fak hle a, tunhnai season liamta chhoah khan Anderlecht tan a thawhhlawk hle tih min hrilh.

“Hmasawnna kalkawng a zawh belh lehna turah Albert hi a inpeihchhuak tawh tih kan ring nghet tlat a, a theihna leh a uapna zawng zawng nen squad member thar a nihna angin kan lo lawm e.”

Arsenal technical director Edu pawhin Albert an lalut thei lawmawm a tih thu leh an target lian a nih thu sawi chungin an mifield laihawlah chakna leh ngialnghehna a thlen ngei tur thu a sawi ve bawk.

Gunners hian Brighton leh England defender Ben White pawh pound maktaduai 50-in an beisei leh mek a; tun nipui insuan hun lai vek hian kum 21 mi left-back Nuno Tavares chu Benfica atangin pound maktaduai riatin an lo thlung fel tawh bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy