Inrinni zana English Premier League khelhah si Arsenal chu an mikhual AFC Bournemouth lakah si hnih ngawtin an hnufual a. An mualah tlawm ngei tura ngaih an nih laiin ropui zetin a khingpuite an lehthal a. 3-2 Bournemouth an hneh hi season kal mekah Arsenal thawh lehna ni ropui ber a ni. Inrinni zana inkhel dangah Manchester City leh Chelsea ten hnehna an chang ve bawk.
Thawhlehna ni ropui chu
EPL-a hmahruai mektu Arsenal hian Emirates Stadium-ah table mawngphaha awm mek AFC Bournemouth an mikhual a. An mualah awlsam taka chak a, point thum hmu ngei tura ngaih an ni. Chak tura rinkai zawk ni mahse an mualah ngei an tlawm teuh hle a, chak turin hun pek belh zawh rat thleng an ngah a ngai ta hial zawk.
Table mawngphah luahtu Bournemouth hian hmahruaitu Arsenal lakah duhthusam a thain bul an tan a, inkhel tan atanga second 9.11 chhung lekin goal an thun nghal. Inkhel tan tirhteah fuh zetin mualneitu an nawr tlang nghal a. Philip Billing chuan awlsam taka pet goal in hmahruaina goal a thun nghal. He goal hian mualneitu Arsenak a barakhaih chiang hle.
Inkhel tan atanga minute chanve em pawh tlin lova goal an chhuah hi sut tumin Arsenal in thapui an thawh zui nghal a, an mikhualte an nawr bet hle. Ball chang tam falin, an khingpuite nawr na viau mahse an goal venhim tuma tan khawh Bournemouth an nawr tlang thei lova, goal thun theihna hun tha an insiamchhuah thei lo. An mikhualte hi an goal bulah an intlar thup a, an si nghak Beto pawhin hun a pawt khawmuang thei viau bawk. Defensive game khelh nghal an thlang hi an tifuh a, goal thun belh theihna hun tha nei bawk mahse goal an thun belh thei bik lova, si khat faia hmahruai chungin chawlhlawk an hmang.
Chawlhlawk hnu lamah Bournemouth an hlauhawm hmasa leh zawk a, goal an thun belh leh ta hial bawk. An hun tha hmasa an hlah hnuin minute 57-naah Marcos Senesi chuan chiang zetin a tauh goal a, an goal hnihna a thun.
Goal hnih an chhuah zawn a, an khingpui tlar-hnung an paltlang hleitheih bawk si loh vangin Arsenal hi an mualah ngei mualpho va, tlawm tura ngaih a ni hman. Arsenal hi an chak dawn lo ngeia a lan vangin Manchester City tantute an phur hman viau nghe nghe a. City nen an inkarah point hnih chauh a tlak zeh dawn vangin Gunners tantute an hlauthawng ve thung a, an hnual viau bawk.
Arsenal manager Mikel Arteta chuan player siksawi an mamawh tih hriain Trossard thlaktu Smith Rowe a la chhuak a, rawlthar Reiss Nelson a dah lut. Nelson hian game a thlak dang lama, assist a neih bakah chakna goal thun zui ta hial a, a hming a chher lian hluai.
Goal thun mamawh Arsenal tan hian minute 62-naah Thomas Partey chuan goal thunin an si phurh a sut then. He goal vang hian tlawm pumpelh beiseina thar an nei. Minute 70-naah bench atanga lut Nelson chuan tha zetin a siam lut a, Nelson siam tha tak hi defender Ben White chuan near post-ah pet goal in an si phurh a sut. An si phurh an sut zawh vangin Arsenal an phur thar a, Emirates Stadium a mipui pungkhawm tha-wm a tha ta viau bawk.
Goal thun belh ngei tumin Gunners hian an mikhualte an nawr zui chiam a, an hun tha neih an hlah a, tum thum ngawt penalty an beisei thlawn hnuin hun pek belh minute ruk pawh an hmang zo ta hial. Hun pek belh a zawh hnuin game kal lai a laklawh a, Arsenal in corner an an pet zui leh. Corner atanga ball kal hi Bournemouth lamin an duh angin an tuahchhuak tha thei lova, Nelson an awma dawn nuam tawk chauhin a tla, Nelson hian a awma ball a dawn hnuin a insiam rem a, hmun awl zim teah kawh zeta petin, minute 90+7-ah pui zetin hma an hruai letna goal a thun a. Thlana phum thawh ang hiala ngaih Arsenal chu ropui takin an thochhuak leh a, 3-2 a an mikhualte lehthalin thawhlehna ni ropui an tawng a, point thum hlu bik an hmu.
Ropui taka an mikhual Bournemouth lehthaltu Arsenal hian khelh 26 atangin point 63 an hmu a, point ngaa hmahruai fal chungin hma lam an pan zel. Uiawm taka an tlawm vangin AFC Bournemouth hian khelh 25 atanga point 21 hmuin, table mawngphah an luah nghet ve thung.
City leh Chelse an chak
Inrinni zana inkhel hmasa berah champion lai Manchester City chuan Etihad Stadium-a an mikhual Newcastle United chu si hnih faiin an hneh a, Arsenal an um vel zel.
City tan hian minute 15-naah Phil Foden chuan hmahruaina goal a thun a. Bench atanga lut Bernardo Silva chuan minute 65-naah an goal hnihna a thun a, an chakna a nem nghet.
City leh Arsenal an chak rual hian tunhnaia chak harsat Chelsea chuan an mikhual Leeds United chu Wesley Fofana goal thun hmangin an hneh ve bawk.
Arsenal thawhlehna ni ropui
![](https://theaizawlpost.org/wp-content/uploads/2023/03/ar-1.jpg)