Article 371G hrerengin hma kan la
– Lalruatkima
Hnam tana thil pawimawhah Article 371G neitu kan nihna hrereng chungin MNF sawrkar khan hma a la thin tih MNF hruaitu Lalruatkima chuan a sawi.
Thawhtannia Mizo Hnam Runa inkhawmah MNF treasurer Lalruatkima chuan, The Mizoram Land Revenue Laws 2013-ah Indian Air Force-in ‘outright purchase’ (a hmun leh a hmaa inleisak tawp) hmangin ram an lei ngawt thei loa, land acquisition dan anga kalpui tur niin, Lengpui ram chu Garden LSC a nih avangin ‘land lease’ a leh hmasak vek tur a ni a. Heng dan zawm tur awm hi tun sawrkar hian a palzut em, tiin a zawt.
“Sawrkar hmasa khan Mizoram tana bituk liau liau The Mizoram (Land Acquisition, Rehabilitation & Resettlement) Act 2016 a siam a. Gauhati High Court thutlukna avanga harsatna a awm pawhin, hnam tana thil pawimawh Article 371G neitu kan nihna hrereng chungin hma lak a ni thin. Tun sawrkar hian dan awm lo leh sawrkar hmasa mawhchhiat phet tumna rilru puin thudik lo mipuiah an vawrh kual a, MNF chuan pawi kan ti takzet,” a ti.
Tun sawrkarin ‘responsibility’ leh ‘transparency’ vawnnun aiin, thil dik lo a awm apianga sawrkar hmasa mawhchhiat leh midang puh chu an kalpui ber niin Revenue minister hlui Lalruatkima hian a sawi a. IAF tana Lengpui ram lak chungchangah pawh chief minister leh Revenue minister-ten DC-te mawhphurhna anga an sawi chu thil mak tak a ni, tiin, land acquisition-ah preliminary notification chu a bultanna a ni a, he notification hi ZPM sawrkar chuan 2025 May 15 khan a tichhuak tih a sawi a ni.
Lengpui ram lei dana corruption awm anga inrinhlelhna chungchangah MNF treasurer a nihna leh Revenue minister hlui a nih angin, cheng khat pawh party emaw mimal anga an dawn a hre lo tih a sawi a. Mimal anga a lo dawng a nih chuan a let 10-a rulh pawh a inhuam a. Tuna CM leh Revenue minister hian chutiang chu an inhuam ve em, tiin a zawt a ni.
Article 371G hrerengin hma kan la – Lalruatkima
