Sawrkar laipui scheme – ‘Ek Bharat Shreshtha Bharat’ hmalakna hnuaiah Mizoram larsap Dr Hari Babu Kambhampati chuan Thawhlehni khan Mizoram leh Arunachal Pradesh State-te pualin Foundation Day lawmna a buatsaih.
Larsap chuan kum 37 kalta khan Mizoram leh Arunachal Pradesh chu India ram state 23-na leh 24-na atana puan a ni, tiin, Foundation Day lawm tura state pahnih aiawha kalkhawmte a lo lawm tih a sawi.
British rorelna hnuaia awm hun ata tawh kum 1972 thlengin Arunachal Pradesh chu North East Frontier Agency (NEFA) tia vuah a nih thu leh hemi kum, 1972 January 20-ah Union Territory-a hlankai niin, Arunachal Pradesh tia thlak a nih tak thu a sawi a. State of Arunachal Pradesh Act 1986 hmangin India state 24-na turin 1987 February 20-ah state puitlinga hlankai a ni tih a sawi a ni.
Mizoram leh Arunchal Pradesh-ten international border thui tak an neih thu leh Mizoramin Myanmar leh Bangladesh, Arunachal Pradesh-in China, Bhutan leh Tibet a neih thu Dr Hari Babu Kambhampati hian a sawi a. Hei vang hian state pahnihin ram venhim leh inpumkhatna siam kawngah mawhphurhna lian tak an nei dun tih a sawi.
“Mahni mihringpuite chunga ngilneihna hloh chuang loa ram hmangaihna leh venhim kawnga dinngheh tlat a tul a. India khua leh tui kan nih theuh avangin kan chenna ram venhim hi kan zavaia mawhphurhna a ni,” a ti.
India ram state leh UT-a chengte inkarah inpawhna tha zawk leh inunauna tha zawk siam a nih theih nana sawrkar laipui programme – Ek Bharat Shreshtha Bharat hnuaia hma lak a nih thu larsap hian a sawi a. “State dangte hun pawimawh kan inlawmsak tawn pawh hi hemi hnuaia hmalakna hlawhtlinna tarlangtu pakhat a ni a. Khua leh tui kan nih angin kan ram chhunga hnam ziarang hausa tak hi kan hriatchiana kan inzahsaktawn a pawimawh hle a ni,” a ti bawk.
Hun hmannaah hian Arunachal Pradesh larsap Lt. Gen. KT Parnaik video message ngaihthlak a ni a. Arunachal Pradesh state chunchang video clip thlirho a ni. State pahnih zirlai MZU leh RIPANS atanga tel ten hnam lam leh zai an entir a ni.
Northeast Areas (Reorganisation) Act 1971 hnuaiah kum 1972 khan Mizoram chu union territory (UT) a puan a ni a. India ram danpui siamthat vawi 53-na, 1986 hnuah India ram state 23-na ni tura hlankai a ni. Arunachal Pradesh hi North-East Frontier Agency (NEFA) tia koh niin, kum 1972 khan NEFA hi UT-a hlankai a ni a. 1987 February 20 khan India danpui siamthat vawi 55-na, 1986 hnuah India ram state 24-na a ni.
Arunachal State Day lawm
