Tun hnaia containment zone-a puan Melriat-a arvulhtute chuan Ningani khan lawmthu sawi nan ZMC leh CCC pathumah ar an pe.
All Mizoram Poultry Farmers Association, Melriat Branch chuan an ar thawhkhawm 40 chu ZMC-a Covid-19 natna vanga enkawl laite leh thawktute ei atan te, Berawtlang, ITI leh Tuikhuahtlang-a Covid Care Centre (CCC) tea enkawl mekte ei atan an pe a ni.
An hruaitute chuan lawmthu sawina a nih thu lehan tih theih tawk an lo pawm avanga an lawmthu te an sawi.
An hruaitute sawi danin, containment zone-a puan an nih chhungin archaw an ngaihtuah thei lo a, sorkarin archaw a ngaihtuahsak a, ZMC-in Melriat-a positive hriatchhuahte leh hmun danga mite theihtawp chhuahin an enkawl a, hri laka an him nan sorkarin theihtawp a chhuah a, Melriat LLTF leh an bialtu MLA te’n mipui him nan theihtawp an chhuah a, chung thil hrang hrang avanga an lawm em avangin ar an thawhkhawm ta a ni.
Melriat Presbyterian Kohhran Hmeichhia te’n September ni 8 khan ZMC hi arsa an lo pe tawh bawk.
(THE AIZAWL POST – Tualchhung)
Full>> ePaper Subscribe
