Republic of Ireland tana match 22 khel tling tawh Evan Ferguson chu Premier League club Brighton & Hove Albion-in loan-in Italian club AS Roma lamah an kaltir ta a, Seriea A team tan season khat a khel phawt ang.
Striker Ferguson hian hliam a tawrh hnuah a career tundin leh duhin hmun a hlohna Seagulls chhuahsana Italy-a intuaihriam a thlang a; Brighton head coach Fabian Hurzeler chuan season liamtaah an striker chuan hun khirh tak a tawh thu leh hliam avanga a inkhelh tam theih loh thu sawi chungin, “Regular khelhna hun leh hmun chan a duh takzet a, he hun remchang inhawng ta hi a tan chuan a phurawm hle dawn a, league khawng taka khelh theihna leh European football khelh phakna kawng a ni,” a ti.
Ferguson hian season liamta second half-ah khan loan bawkin West Ham a lo pan tawh a, khatih laia an manager Graham Potter-a hnuaiah khan game riat chiah khelin, starting eleven phei chu vawi khat chiah a chang a; Rome khaw lamah hian eng tak ang leh ang maw?
Social media lamah chuan Ferguson leh Roma fans inlawm dan vel thlalak hmuh tur a awm tawh a, autograph-te an in dil a, hliam avanga a career thui lote tuaivul chhoh leh a tumna kawngah eng dinhmun nge a thlen dawn sawilawk mai theih a ni rih lo.
Kum 20 mi hi hmalam hun eng zawk la nei thei turin niin, 2022-23 campaign khan PFA Young Player of the Year award dawng thei tur nominee zingahte pawh a rawn tel pha hial kha a ni a; kha mi kum khan goal kua khungin senior international a kai chhoh tan kum a ni bawk.
Tarlan tak angin, hliam neuh neuhin a tibuai chho ta tlat a, November 2023 hnu lam club level-ah goal khat chiah la khungin, Rome khaw lamah inpuchhuak lo ni se tun season thar lo herchhuak turah pawh hian German Fabian Marc Hurzeler-a hnuaiah khelhna hmun tha a beisei mai thiang rih lo ang!
AS Roma tana loan-a khel tur striker Ferguson
