Daily Newspaper

ASEP-in dan lekkawh turin sawrkar ngen

9

Phaizau khawtlang lui humhalh laia bomb hmanga sangha mantute chu dan anga sawrkarin an chunga ro a rel an duh tih Association for Environmental Preservation chuan an sawi.

ASEP Gen. Hqrs. thuchhuak chuan, Phaizau VC leh All NGOs in an lui humhalh huamchhunga gelatin hmanga sangha bomb an awm thu an lo hriatin lungchhiatthlak a tih thu a sawi a. Sawrkarin luidung nungcha humhalh tura uar taka zirtirna a pek lai leh khaw hrang hrangin mahni huamchhunga lui an humhalh laia sawrkarin a phal loh hmanraw hmanga thiltih a awm chu pawi a tih thu a sawi.

Phaizau khawtlang hmalakna chu chhuanawm a tih thu ASEP hian sawiin, an lui humhalh chhunga pawikhawihtute chu danin a sawi angin sawrkarin rorelna lekkawh ngei se tih chu a duhdan a ni tih a sawi. ‘Pawikhawihtu zingah ram roreltu leh dan siamtu zing ami Mamit bialtu MLA a tel ve hi a pawi lehzual a, midangte zirtirtu leh khaptu tur zawk si, pawikhawihtu zinga a tel ve hi a pawi takzet a ni,’ a ti.

Tun hnuah hetiang thil hi sawrkar leh khawtlangin an humhalh hmunah thleng tawh lo se ASEP chuan a duh tih sawiin, sawrkar pawhin khauh zawkin hma lak turin a ngen tih a sawi a ni.

Phaizau khawtlang lui humhalha khawtlang leh sawrkar phal loha chetna chungchangah hian Phaizau khawtlang hruaitu – VC leh All NGOs chuan sumfai chawi tura an tihte hian tun thlengin an la chawi lo tih an sawi a. 2020 December 4 thleng hun an pe a ni.

He thil thleng chungchangah hian inremsiamna zawnga political party anga hma la an awm leh awm loh hi Mamit-a nitin chanchinbu Mamit Times chuan Phaizau YMA president Zarzoliana a zawt a. A ni chuan palai hna thawk an awm ngei thu sawiin, political party thil emaw thil dang vanga VC leh All NGOs thutlukna siam tawh palzam zawnga hmalakna siam emaw thutlukna dang siam a nih dawn chuan, thawhhonaah YMA anga an tel chhunzawm zel a rem loh tur thu a sawi a ni, a ti.

Hetihlai hian, dan ang loa sangha mantute thlavang hauh zawnga mimal hminga thuchhuah siamtu Chuauthantluanga, Phaizau chuan All NGOs hnenah ngaihdam a dil nia thu dawn a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy