ASF hrileng a zia deuh
March thla chawhnu lam atangin African Swine Fever (ASF) hrilengin Mizoram a tibuai leh a, vanneihthlak takin tun hnaiah a zia deuh.
May 11, Chawlhni khan ASF vanga vawk thi a awm lo a, vawk suat (cull) a awm lo bawk. Hei hi March ni 20 hnua kumina ASF vanga vawk thi leh vawk suat a awm loh vawi khatna a ni.
‘ASF a zia deuh tihna a ni a, thi a awm loh ni a awm hi thil lawmawm a tling a,’ AH&Vety department lam chuan an ti a, chutih rual chuan thil a danglam thut thut thei reng tih an sawi bawk.
ASF hi kuminah March ni 20-ah Mizoramin a hre tan a, vawk thi zat a pung chak hle. Mahse tun hnaiah a zia deuh a, May ni 10-ah vawk thi zat pariat a ni a, a tukah vawk thi a awm lo. Hei hi department lam chuan thil lawmawmah an ngai.
Hri leh a lenna hmunah a nasa a, mahse a darh chur chur lo. Hei hi AH&Vety department lam chuan lawmawm an ti a, Mizoramah kuminah district pali-ah finfiah a ni tawh a, district dang an la him bakah a lenna district-ah pawh hian hmun zau zawkah a darh belh lem lo.
AH&Vety department hotute chuan Mamit, Lunglei, Siaha leh Lawngtlai district-ahte ASF hi finfiah a nih tawh thu leh, a lenna hmasa Mamit district lamah a reh rih thu te, Lunglei-ah pawh hmun hnih khatah an hmu tih te an sawi a, Lawngtlai leh Siaha district te’n an tuar ber rih tih te an sawi.
An chhinchhiah danin, May ni 12 thleng khan kumin ASF vangin Mizoramah vawk 3883 a thi tawh a, vawk 1168 suat a ni tawh. Kuminah ASF hi district palia khua/veng 53-ah finfiah a ni tawh.
ASF hi 2021-ah Mizoramah finfiah a ni a, hemi hnu hian kum tin he hri hi a leng a ni.
ASF hrileng a zia deuh
