African Swine Fever (ASF) hriin kum nga chhung Mizoram a awm chilh tawh a, vawk pawh a thi nasa. He hri vang hian Mizoramin vawk nuai 1.2 chuang a chan tawh.
AH&Vety department chhinchhiah danin, ASF vang hian vawk 72012 a thi tawh a, he hri vang hian vawk 52979 tihhlum/suat a ni tawh bawk. ASF vanga vawk thi tawh hi a vaiin 1,24,991 a ni.
ASF hi tihdam theih loh natna a ni a, he hri laka invenna a awm lo. Tihdam theih loh a nih avang hian he hri kai vawk chu tihhlum a ni thin a, hri a darh zel loh nan tihhlum a ngai thin.
2021-ah ASF hi Mizoramah finfiah a ni a, chumi hnuah chuan he hri hi kum tin a la leng. Hri finfiah kum hi a nasat ber kum a ni a, 2023 kha chuan a nasa lo. Mahse a kum lehah a nasa leh a, nikum khan a nasa vak lo leh bawk.
AH&Vety department chhinchhiah danin, nikum December ni 10 hnuah ASF vei hriat thar a awm tawh rih lo a, ni 30 chuang a ni tawh.
ASF hi ram hrang hrangah finfiah a ni tawh a, Mizoram thenawm state-te pawhin an tuar; tun hnaiah Mizoramah he hri vei hriat thar a awm loh laiin Mizoram thenawm state thenkhatah chuan hriat thar a awm deuh reng.
Mizoramah ASF hi a zia rih a, thlasik lai hi chu a zia lai a ni thin ve reng reng. 2025-ah pawh khan thlasik laiin a zia a, March ni 20-ah ASF vangin vawk a thi leh tan.
Kum Thi Suat
2021 33417 12568
2022 12795 11686
2023 1139 928
2024 14950 24177
2025 9711 3620
Total 72012 52979
ASF vangin vawk nuai 1.2 chuang chan tawh
