Asia khawmualpuia Film Festival hriat hlawh leh lian ber zinga ami, Korea-a Busan International Film Festival vawi 28-naah Mizo film siamtu pahnih Raymond Remlalmuana (Raymond Colney) leh Andrew Vanengmawia (Drew Pachuau) te an tel.
An pahnih hi Mizoram aiawh turin Information & Public Relations department-in a thlang a, an kalna tur senso hi sawrkar laipui Ministry of Information & Broadcasting leh National Films Development Corporation (NFDC) in an tum dawn a ni.
Busan International Film Festival-a tel tur hian hmarchhak state tin atangin film siamtu (film maker) pahnih theuh thlan an ni a. Kum 2023 pawh khan Ministry of Information & Broadcasting chuan hmarchhak state tin atangin filmmaker pahnih theuh Cannes International Film Festival chhim turin an lo hruai tawh a. Chumi tum chuan Napolean RZ Thanga leh Aldrin Zosangliana te an kal.
Busan International Film Festival hi October 2 khan tan niin, October 11-ah a tiak dawn a. Hmarchhak filmmaker-te hian ni 5 chhung Festival an chhim ang.
Asia huap Film Festival-ah Mizo tel
