Asian champion team-a tel Mizo
hockey player pahnih lawmpui
September 13-a Women’s Hockey Junior Asia Cup 2026-a champion India team-a tel Mizo tleirawl pahnih – F Lalbiaksiami, Lunglei leh Lalrinpuii, Hnahthial chu Ningani khan Sports & Youth Services minister Lalnghinglova Hmar chuan a lawmpui.
Sports minister chuan, hockey hi a khel an tam a, hnamdang leh ram inelna angah phei chuan champion nih thil harsa tak a ni a, Asia champion nih hi thil namai lo tak a ni tih a sawi. “Mizoram min tihmingtha a, in hlawhtlinna hian Mizote leh infiammi dang bakah keimah pawh min ti phur a ni,” a ti.
Empowering Mizoram Sports an kalpui mekah hockey an telh a, theihtawp chhuahin tan an la zel dawn a. India chu hockey-ah a tha a, Mizote tana Olympic thlenga medal hnaihna ber pakhat a ni tih a sawi.
Hockey Mizoram-in Thenzawl-a academy atangin player tha a chherchhuak reng a. Player pahnih khat vawrhchhuah chauh ni loin, a kum bithliah ang zelin a zawnin chherchhuah an nei ta reng a, hei hian kan kaldan a dik tih a tilang tih Lalnghinglova Hmar hian a sawi a. “Kan kal dan a dik tawh chuan a mihring kan neih belh zel tawh dawn a, a zar kan zo zel dawn a ni,” a ti.
Kawnpui-a Boys Hockey Academy chu Thenzawl academy entawna tih len tum a nih thu, Muallungthu Hockey Academy tihchangtlun mek niin sprinkler system atan generator lian lei a ni tawh thu, PMJVK atangin Hnahthial-a hockey ground siamna tur remtihna a awm tawh thu, Kolasib-ah India player Lalremsiami hmingin hockey ground siam tura hma lak mek a nih thu a sawi bawk.
2026 Women’s Hockey Junior Asia Cup hi September 4 atang khan China-a Moqi Training Base-ah khelh a ni a. Under-20 inelna niin September 13 (Pathianni) khan final khelh a ni. India hi a zawna vawi thum a champion-na niin, hei vang hian 2027 FIH Junior World Cup khel turin an tling nghal.
Asian champion team-a tel Mizo hockey player pahnih lawmpui
