Asian Games khel tur Indian women’s hockey team
Mizo player pahnih Lalremsiami leh Lalthantluangi telna Indian women’s hockey team chuan Japan an thlawklut tawh a, India huna September ni 20, 2026 zing dar 7:30 khian an bultanna inkhelah Uzbekistan an hmachhawn dawn a; an champion chuan Los Angeles khawpuiin Olympic a thlen tur LA 2028 hockey inelnaa tel turin an tling nghal ang.
20th Asian Games hi Aichi-Nagoya hmuna nghah niin, tarlan tak angin, gold medal lak hi 2028 Los Angeles Olympics khel tura direct qualification hmuhna a nih avangin India tan a pawimawh takzet a ni.
Hei vang hian India head coach Sjoerd Marijne pawhin a naute a vaukhan lawk na hle a, Pool B lama an tum tur team zingah China tih loh chu world number eight ni mek India aia ranking hniam vek an nih thu leh chuti ang dinhmuna an din laia chet nawi niai a rem loh thu a sawi!
India hian 2026 FIH Hockey World Cup-ah khan an aia ranking nei sang Australia leh Netherlands-te pawh a lo hmachhawn tawh a, Asian Games-ah na na na hi chuan chungnung larh turin Dutch international hlui hian a naute a fuih mek a ni.
Captain Salima Tete hoa Asian Games khel tur India hian 2026 campaign an tlawh hawng tha a, June thla FIH Hockey Women’s Nations Cup trophy lain, World Cup-ah pangana an hauh pha bawk a, kha kha kum 1974 daih tawha palina an nih hnua India World Cup result tha ber a la ni.
Asian Games-ah India hi a thlengtu Japan, Thailand, Singapore, Indonesia leh Uzbekistan-te nen pool khatah an awmho a; Uzbekistan zawhah hian Indonesia (September 21), Thailand (September 23), Japan (September 25) leh Singapore (September 27) an tum zui leh ang.
Knockout stage hi September ni 30 atanga khelh tan tur niin, gold-medal match hi October ni 2 atan dah a ni.
Tarlan tawh thin angin, kumin kumtir lam khan India kutah Nations Cup title lutin, final-ah si hnih faiin New Zealand an hneh a, FIH Pro League khel turin an tlin phah.
Kumin World Cup-ah khan vawi khat chiah an tlawm a, draw vawi thum neiin, vawi hnih an chak a, an inhnehtawkpui team pathum – China, England leh Australia-te kha an aia ranking nei sang zawk thiau niin, South Africa phei chu 6-1 ngawtin an sawp a; an match hnuhnungberah 3-1-in world No. 5 Germany an hneh bawk.
Tuntum Asian Games-a India tana team khawng ni tura ngaihte chu China, Japan leh South Korea-te an ni.
20-member squad-a experienced player kan hmuhte chu Savita, Navneet Kaur, Neha, Nikki Pradhan, Lalremsiami leh Sushila Chanu Pukhrambam-te niin, promising younger player engemawzatin an pawlh bawk.
Mizo nula tuarchhel leh huaisen Siami tan Asian Games hi thil thar a ni lo a, kum 2023 khan India chu bronze medal a lo lakpui tawh a ni.
Japan ram pawh hi Mizo nula tan tumruhna petu ni zel tura ngaih a ni!
Kum 2019 khan Hiroshima khawpuia India tana a fehchhuah laiin a pa thih thuin a thawng a, thlawk haw se a pa ruang a nang hman tawh dawn chuang lo bawk nen haw loa ram tana inkhelh a thlang a, mittui nena khelmual lut chungin India chu Olympic khel turin a tlinpui a, kha mi tuma ram tana a inpekna thuk tak kha kumina Arjuna award a dawn chhan pakhat pawh niin a lang.
Kum 1982 hnu lamah India nulate hian Asian Games hockey gold medal an la awrh leh ngai ta lo a, kumin hian Mizo player pahnihte hian champion-pui zo tak ang maw?
India squad
Savita, Bichu Devi Kharibam, Ishika Chaudhary, Sushila Chanu Pukhrambam, Lalthantluangi, Jyoti, Shilpi Dabas, Nikki Pradhan, Sakshi Rana, Sunelita Toppo, Salima Tete (C), Neha, Deepika Soreng, Lalremsiami, Rutuja Dadaso Pisal, Navneet Kaur, Deepika, Ishika,
Baljeet Kaur and Beauty Dungdung.