Asian nulate chetthat kum!

Asian nulate chetthat kum!
Kumin hian Asian nulate’n US Open hmeichhe singles lamah bul an tan tha a, qualifier Janice Tjen chu Indonesia player zinga kum 22 chhunga Grand Slam main draw hnehna chang thei hmasaber niin, 24th seed Veronika Kudermetova lakah rin loh lutukin 6-4, 4-6, 6-4 hnehna a sualchhuak nawlh!
Philippines nula Alexandra Ealapawhin New York khaw mipui lawm a hlawh a, deciding set-a 1-5 laia a hnufual hnuah kawng dik zawhin Denmark player 14th seed Clara Tauson lakah 6-3, 2-6, 7-6(11) hnehna a chang a, Asian hmeichhe zinga history siamtu zingah a tel.
Pathianni first round-a chak ve ve Filipino Eala leh Indonesian Tjen-te kha Southeast Asia atanga Flushing Meadows boruak neilian thei hmasa niin, Eala kha Filipino player zinga professional era-a Grand Slam main draw match-a chak thei hmasaber a ni.
Hnehna a chan ruala a mittui dang zo lo Alexandra Eala chuan, “Engkim mai kha ka tan chuan a special hliah hliah vek a; kan ram atanga he thi ti thei hmasaber ka ni pawh hi a mak a, malsawmna ka dawng nasa hle a, he ram aiawhtu ka ni hi ka inchhuang a ni,” a ti.
Kum 20 mi hi Flushing Meadows-ah a mikhual lutuk lo a, kum 2022 pawh khan he hmunah hian history lo siam tawhin, Filipino zinga junior Grand Slam singles title la thei hmasaber a lo ni tawh.
Eala hian Nilaini second-round match pakhatah nizan inkhel result tarlan hman loh zinga Spain player Cristina Bucsa leh American qualifier Claire Liu inkhela chak zawk zawk a tum leh ang.
First round match danga Southeast Asia nula chak dang kan hmuh Janice Tjen chuan second round-ah Britain number one Emma Raducanu a tum dawn a, barakhaih lian tham a beisei leh mek!
Kum 23-a upa Tjen hi 2004 US Open-a inlan Angelique Widjaja hnu lama Indonesia atanga major tournament singles khel leh thei player hmasaber niin, a hnehna sualchhuah chuan an ram lamah naupang tennis player-te a chawhphur ngei a beisei thu a sawi.
Jakarta nula hi University of Oregon and Pepperdine University-a khel thin niin, nikum khan he hmunah hian NCAA doubles runner-up a lo ni tawh nghe nghe.
Kumin kumtir lam khan sociology subject-a graduate degree a lak hnuin a kalkawng tur a buk a, professional tennis khelh a thlang ta rih a ni.
Tjen chuan, “College ka kal lai khan ka awm dan tur hi ka ngaihtuah fo a, zirna lamah ka kal chhunzawm dawn nge ka inkhel ang tih ka buk fe hnuah Pepperdine hmuna coach-te chuan kum hnih vel tal chu tennis lama han inenchhin turin thurawn min pe a,” tiin professional tennis a luhchilh dan a sawi.
A tum leh tur Raducanu chungchang sawiin, “Ka rilrua lo lut hmasaber chu heti ang vel hi a ni – mipui an tam ang a, amah mi hriat hlawh a lo ni a, mipui an tam pauh leh a tan boruak a rit ting dawn a, hun remchang inhawng mek hian min tiphur tawh takzet a ni,” a ti.