Daily Newspaper

“Assam chet dana PM leh HM la ngawi tlat hi a mak”

9

Mizoram leh Assam boruak avanga tun thlenga Assam-in Mizoram chak lakluhna kawng a dang leh rel kawng a tihchhiat chungchangah India sawrkara Prime minister leh Home minister bakah President te an ngawi tlat chu mak an tiin an hrethiam lo hle tih Joint Action Committee on Inner Line Reserved Forest Demand chuan an sawi.

JAC on ILRFD hian thuchhuah siamin, Assam chief minister-in Mizoram chak lakluhna kawngpui a dang leh rel kawng tihchhiat mai pawh duh tawk lo a, damlo enkawlna tur damdawi thleng thlenga a hrek duh chu a ngaithiam lo takzet tih a sawi a. ‘He thil hian inremna aiin Mizo mipui thinrimna leh state pahnih inkara inhmuhthiam lohna bak a thlen dawn lo tih Assam CM Himanta Biswas Sarma hian hre turin kan hriattir a, a rang thei ang berin kawngpui hawnga an thil tih dik lohah ngaihdam dil turin kan hriattir a ni,’ a ti.

Assam-in Mizoram leh mipui chak lakluhna ber dan lo anga an dan lai leh rel kawng tichhiaa damlote hman tur damdawi thlenga a hrek lai a, Prime minister Narendra Modi leh Home minister Amit Shah ten engmah khakna leh an tih dik loha action lak tumna an nei lo chu mak a tiin a hrethiam lo hle tih a sawi a. Mizoram leh Mizo mipui chu India constitution leh inkaih-hruaina hnuaiah khua leh tui kan ni ta lo em ni tih chu India President leh Prime minister an zawt tih an sawi.

‘India khua leh tuia min la ngai a nih chuan Assam CM thil tih dan hi thu leh awm loa titawpa hremna pe ngei turin kan ngen a, kan ram dik tak 1875 boundary anga min pe a, a chhunga dan lo anga cheng Bangladeshi-te hi hnawtchhuak nghal turin kan ngen bawk,’ thuchhuah chuan a ti.

Mizoram leh Mizo mipuite chu mahni pawl leh mimal ngaihdante sawia pholang mai mai lo turin JAC on ILRFD chuan ngen tih a sawi a. 1875 ramri bak ramri dang kan nei loin an pawm lo tih sawiin, media velah thuthang dik lo leh video clip te post a thehdarh lo tura an ngen thu te, Mizoram sawrkarin ram leh hnam him nan Assam Police danga kut hial a thawh chu lawmawm a tiin, a tawp thlengin JAC chuan sawrkar a thlawp dawn thute a tarlang bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy