Daily Newspaper

Assam CM chhanlet a pawimawh

19

Assam chief minister chuan tunhnaia Vairengte daia inkahna a thlen chhan chu ramri boruak vang ni lovin, Myanmar atanga raltlante awmna tur hmun Assam-in Mizoram a pek duh loh vang niin a sawi a. Assam-in bawng humhalhna (cow protection law) a buaipui chu Kristian state Mizoramin an duh loh vang, niin a sawi bawk. Assam CM thusawi hi July ni 28 chhuak Times of India-ah tihchhuah a ni.

Hei bakah hian India Today TV leh website lamah, Assam sorkar lam atanga an thu dawn an tarlan danin, Himanta Biswa Sarma kaihhruai sorkar hian tun hnaiah ruihhlova sumdawnna an chhu chat a, hei hian Mizorama ruihhlo hmanga sumdawngte leh an thawhpuite a tilungawi lo a. Assam-in ruihhlo an man nasain an tichhe nasa a, hei hian ruihhlova sumdawnnaa inrawlh Mizo politician-te a tilungawi lo, tiin tarlan a ni bawk.

Assam chief minister-in ramria inkahna thlen chhan nia a sawite hi thil awmang lo lutuk vek mai a ni a. India hmarchhak state lian ber chief minister ve meuh siin hetiang thubelhchian dawllo tak mai India ram mipui a fah chiam mai hi, thlir liam mai chi niin a lang lo.

National news lama Assam chief minister thusawi zawng zawng a dik loh dan leh, ramria inkahna a thlen chhan pawh Assam lam dik loh hmasak vang liau liau a nihzia hi, Assam chief minister thusawi tihchhuahna newspaper, TV leh agency-ah te chipchiar taka tihchhuah ve ngei a nih theih nan, Mizoram sawrkar thuneitute hian ruahmanna an siam ve a pawimawh dawn ta hle niin a lang.

Hetiang zawnga hma kan lak ve loh chuan, Mizoram chanchin hre tlem em em leh, kan ramri buaina chungchang phei chu a mik a mak pawh rawn hre pha ve lo India ram mipui vaibelchhe tam takte dem hi kan hlawh reng tawh mai dawn tihna a ni a. Assam lamin silaiin min rawn kap vak a, a hnuah dik lo baksakin min puhzui leh bawk a, tunah national highway kaltlanga Mizoram mamawh phurhna kawng an dang ping leh nghal bawk a. An thil tih dik loh dan leh a thiam lo zawk an nih dan khawvel hriata puanzar ve zar zar hi Mizoram sawrkar tihtur pawimawh tak pakhat a ni awm e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy