Daily Newspaper

Assam CM hian ngaihdam dil se: K Vena

98

Aizawl, July 30 : Rajya Sabha member K Vanlalvena chuan Assam chief minister Himanta Biswa Sarma chu Mizoram laka ngaihdam dil turah a ngaih thu a sawi a, “Mizoram laka a chet dan hi a lungawithlak loh a, ngaidam dil se,” a ti.

July ni 28 khan K Vena hi Parliament session-a a tel tur, media lamin lo changin tun hnaia Mizoram leh Assam inhmuhthiam loh chungchangah an lo interview a, hetah hian Assam chief minister-in Mizoram hnaihah commando 4000 kan dah ang tia a sawi chungchang chu K Vena hian a chhang a ni.

‘Assam Police hi kan Mizoram chhungah an rawn lut a, camp an tichhia a. Silai an hmet puak hmasa a, Mizo Police te’n an chhang let mai a ni. Mizoram chhungah an rawn lut leh a nih chuan kan lo tihlum vek ang,’ a ti.
He tawngkam avang hian Assam lamin K Vena hi case siamsak an tum niin an sawi a, Assam Police hotu, an ADGP GP Singh chuan Assam Police team, CID officer-te telna chu Delhi-ah an kal ang a, K Vena laka dan hmanga chet an tum tih a sawi.

Ningani zan tir lam thleng kha chuan K Vena hian hemi chungchangah hian thu dawn a nei lo tih a sawi a, “Social media lam atanga ka hriat bak, engmah information dawn ka nei lo a. He thil hi a awmzia pawh ka hre bik lo,” tiin phone hmangin The Aizawl Post a hrilh.

Assam chief minister chu ngaihdam dil turah a ngaih thu a sawi a, “A chet dan hi a demawm a, Mizote min hmusit a ni,” tiin, “Kan ramah rawn lutin min rawn tibuai a, chuvang chuan silai a puak hial a. Chumi hnuah Mizoram hnaihah commando 4000 kan dah ang tih a sawi leh a, hei hi inhmuhsitna a ni,” a ti bawk.

K Vena chuan Assam chief minister chet dan hi Mizoram tan a na tiin a sawi a, “Inbe turin Shillong-ah kan chief minister an ko thla a, Chawlhni-ah a haw a, home quarantine tih ngaiin a awm a, chutah a tukah Assam Police te chu kan ram chhungah an rawn lut nghal a, silai an hmet puak a. Chu chu inhmuhsitna a ni,” a ti.

“SSB leh CRPF paltlangin kan ramah an rawn lut a, kan police-te, duty post-a tlemte chauh an awm laiin an nawr chhuak a, kan duty post min chhuhsak an tum a. Chumi hnuah silai a puak a, chumi hnuah Mizoram hnaihah commando kan dah dawn tiin a sawi leh a. Hei hi inhmuhsitna a ni a, Mizote min hmusit a ni,” a ti a, “Assam CM hian ngaihdam dil se tih hi ka ngaihdan a ni,” a ti bawk.

Ningani khan K Vena hi Delhi Police te’n house guard an pe a, a chenna hmunah police te’n an veng nghal.

Mizoram chief minister nen an inbiak thu a sawi a, “Kan CM nen pawh kan inbia a, ‘Anni man theih i ni hlei nem. Engah mah lo ngai suh,’ min ti,” a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy