Assam Chief Minister Himanta Biswa Sarma chuan a sorkar chuan Meghalaya a private university pakhat chu, an campus-a tlang rawt hniam chuan Guwahati-ah tuilian a siam avangin National Green Tribuanl (NGT) hnenah an thlen tur thu a sawi.
Chu mai bakah Sarma chuan kum 2001 atanga 2016 inkara Congress Chief Minister Tarun Gogoi pawhin Assam-Mehhalaya border Jorabat atanga tui tam tak luang chuan Guwahati ah ‘artificial flood’ a siam thin tih a pawm tiin a sawi bawk.
Sarma-an a puh ber chu Mahbubul Hoque din leh chancellor a nihna University of Science and technology Meghalaya (USTM) chu a ni.
He varsity hi Meghalaya a Ri-Bhoi district a 9th Mile area a awm niin Assam a Jorabat, Guwahati entry point nena inhnaih taka awm a ni a.
“USTM hi Assam tana hlauhawm a ni. National Green Tribunal hnenah kan thlen ang” tiin chief minister chuan a sawi a.
USTM te chuan an campus tlang chu medical college din a nih theihnan an tan a, chu chuan Assam lamah tuilian a thlen thin tiin a sawi a.
Sarma chuan State Congreess president Bhupen Kumar Borah chu ruahsur leh hunah Jorabat atanga tui luan dan en turin amah tawiawm turin a ngen nghe nghe a ni.
Sarma chuan kar kalta Zirtawpni khan USTM te chu an campus a tlang te building sakna tura rawt hniama ‘flood jihad’ kalpuiah puhin, chu chu Assam khawpui lian ber Guwahati a tuilian thlen thin chhanah a puh bawk.
Sarma puhna hi chhang letin USTM te chuan thuchhuah an siamah Jorabat a tui luang zinga tlemtê chauh chu an campus atanga luang lut a ni ti ve thungin, an campus a construction an kalpui tinah chuan Meghalaya sorkar phalna la thlap veka an tih a nih thu an sawi bawk a.
Sarma thung chuan, “USTM chungchang ka sawi hian Congress te chuan min chhang let nghal a. Mahse, kum 2004 atanga 2014 inkar chhunga paper clips 25 vel ka hmuhah ex-CM Tarun Gogoi pawh khan Guwahati a artificial flood awm chhanah Jorabat a puh a ni” tiin a sawi a. Hei hi chhang letin Congress MP Gaurav Gogoi, Tarun Gogoi fapa ni bawk chuan Sarma puhna chu ‘awmze nei lo’ tiin a sawi.
“Chief Minister of Assam Himanta Biswa an awmze nei lov jihad a ti fo hi titawp turin tu nge hrilh theih ang? A hlawhchhamna leh scam te hliahkhuh nana a chetlakna mai mai a ni,” tiin Gaurav Gogoi chuan a sawi bawk.
Sarma chuan Gaurav Gogoi chuan a pa thil lo sawi tawh te a pha tia sawiin, “Fapain a pa a lo dik lo a tih tawh ber ahnu eng nge sawi theih ka neih” tiin Sarma chuan a chhang let a ni.
Chief Minister chuan USTM chu Tarun Gogoi an thuneihna a chan laia din a ni lo tia sawiin mahse khatih lai pawh khan Jorabat atanga tuihawk luang chuan harsatna a thlen nasa tawh a ti bawk a.
Congress-te chuan USTM chu Muslim pa ta a nih avangin an tan a ni, a ti bawk a. Sarma chuan, “USTM neitu hi Hindu chu ni se, harsatna an siam miah lovang. Mi tihlawm tum politics ah hian tumah inrawlh loh tur” a ti bawk a. Chief Minister chuan opposition party te chu USTM chu a nupui Riniki Bhuyan Sarma ta ni se an thlawp ang em tiin zawhna a siam bawk.
Congress State women wing’s president Mira Borthakur chuan chief minister chuan USTM a bitumna chhan chu mimal thil a ni em tiin a sawi ve thung.
Congress te pawhin Sarma chu chhang letin, “In chhungkuain eirukna nasa tak in kalpui hi i pawm em. Thudik thukhruk tum mah la, kan lailang zel dawn che” tiin an sawi ve thung a.
Sarma chuan USTM a beihna chu chhunzawm zel thungin university chuan an gate-ah pawh Mecca an tarlang tia sawiin mahse Hindu emaw Chsitian religion symbol engmah tarlan an nei ve lo a ti bawk a.
“Eng vangin nge sakhua pakhat chauh hmatheh a nih?” tiin Sarma chuan a ‘flood jihad’ sawi chhun zawmin, “An thil tih mek hi ‘baap’ of jihad a ni. Kan education system tihchiat in a awm mek” tiin a sawi bawk.
Assam CM Sarma-an USTM bitum bur
