Daily Newspaper

Assam CM tlawn kher lo turin minister chah

9

Mizoram minister Robert Romawia Royte chu social media – twitter kaltlanga Assam chief minister Himanta Biswa Sarma tih lungawi tuma amah tlawna thu ziakah Congress party chuan a puh.

Congress party thuchhuak chuan, Mizoram chhung Vairengte-a Assam Police-ten Mizoram Police camp chhuhsaka silai hial an hmehpuah avangin Mizoram Police-in huaisen takin an kap let tih a sawi a. Ram leh hnam tana Mizoram Police-te hnathawh chu a chhuang hle tih sawiin, ramri humhalhna kawnga hlauh nei miah loa theihtawp chhuah thin Vairengte mipuite a ngaihluin a chhuang takzet tih a sawi.

Ramri buaina kal zelah India ram leh khawvel mithmuha thiam chang zawk kan nihzia lantir tura Mizo thalai ten social media-ah a thim a var pawh thlu loa theihtawp chhuaha tan an lak thu sawiin, an thawhrimna leh an hahna zawng zawng Congress party chuan a hriatpuiin a ngaihlu hle tih a sawi. ‘Hnam angin kan tangrual a, mahni tih theih tawk theuhah thahnemngai taka kan ram leh hnam tana kan thawhna hi chhunzawm zel turin Congress party chuan Zoram mipuite a ngen a ni,’ a ti.

Hetih lai hian minister Robert Romawia Royte chuan tun ramri buainaa mawhphurtu bera ngaih, Assam chief minister Himanta Biswa Sarma chu twitter kaltlanga tihlungawi tumin amah tlawnna thuziak a post niin Congress party hian a sawi. ‘Ram leh hnam tana Mizoram mipuite inlungrual taka kan thawhho lai a, Mizo mipuite inpumkhatna leh tanrualna tichhe thei zawng leh Mizo thalaite rilru tihnual tur zawnga vai hlauhtlawnna thu, tunhnai buaina nena inkaihhnawih ni miah lo post a ni ta hi kan hrethiam lo hle a, Assam CM tlawnna thu post tawh lo turin Sport minister Pu Robert Romawia Royte hi kan hriattir a. Pathianin Mizo hnam ropui tak min dinsak timualpho zawng leh, hnamdang ten min hmusit theihna tura khawsa tawh lo turin kan chah a ni,’ a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy