Daily Newspaper

Assam-in Mizoram pawhtu kawng la dang

POST NEWS SERVICE

9

July ni 26-a Mizoram leh Assam Police te’n silai an hmeh puah khan, Assam atanga Mizoram pawhtu kawngpui pawimawh chu Assam lamin an dang nghal a, boruak erawh a ralti lo nia hriat a ni.

July ni 26-a silai a puah hnuah Mizoram chak lakluhna kawng pawimawh, National Highway 306 chu Assam lamin an dang nghal a, Zirtawpni thleng khan he kawngpui kaltlanga Mizorama lirthei lut a la awm lo, Vairengte Police te’n an ti.

Police-te sawi danin, Mizoram atanga chhuak erawh a awm a, tha takin an tlan tlang thei nia hriat a ni. Chuvangin Mizoram lamah lirthei tang, intlar a awm rih lo.

Lailapur lamah pawh tum dang angin lirthei tang, Mizoram lut thei lova intlar a awm chuang lo a, Mizoram pan tumte hi dintir lovin an lettir zel tih thu dawn a ni.

National Highway 306 bakah hian Hailakandi District atanga Kanhmun luhna kawng pawh Assam lam hian an dang a, Kanhmun khawtlang hruaitute chuan hei hi Assam Police te tih a ni, an ti.

July ni 26-ah silai a puak a, a tukah khan Medili lui kam Assam lamah Assam Police hian kawng an dang nghal an ti.

Kanhmun khaw daia Medili lui kam lehlam lehlamah state pahnih police an awm a, nikuma ramri chungchanga state pahnih an inhmuhthiam loh pawh khan Medili lui velah hian boruak a tang hle.

Kanhmun atanga thu dawn danin, July ni 27 atang khan Assam atanga lirthei rawn lut a awm lo a, Mizoram lam atang pawhin an chhuak lo. Medili lui kama duty Assam Police te’n lirthei an lo dang zel.

Kawngpui dan bak state pahnih inthenawmna velah thil duhawm lo a thleng zui rih lo a, a lehlam lehlamah police an duty ngawrh hle. Vairengte dai leh Kanhmun dai bakah hian Aitlang, Saihapui V leh Buarchep daiah te state pahnihin police an awmtir ve ve a, han inep leh innawk ang chi erawh a awm lo tih thu dawn a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy