ASSAM INTHLAN: Bordoloi-a’n Cong chhuahsan, party-ah inhnialna siam

ASSAM INTHLAN: Bordoloi-a’n Cong chhuahsan, party-ah inhnialna siam
Assam Congress hruaitu, Bhupen Borah-a a chhuah hnuah Pradyut Bordoloi-a’n a zui veleh a, assembly inthlan hmain Congress-in harsatna a neih belh a, party hruaituten engvangin nge an dan theih lo tih chungchangah party chhungah inhnialna a chhuak nasat phah hle.
Mi tam tak chuan state party hotupa mawhphurhhna an rinhlelh phah laiin mi dangte chuan Priyanka Gandhi Vadra-i enkawlna hnuaia hetiang thil thleng hi engtin nge a thlen theih tih an zawt thung a. Amah hnaihtu thuneitute chuan an hruaitu lawk hian Screening Committee chairperson hna a chelh tawh thu leh a hna chu candidate thlan a nih thu an sawi.
Bordoloi-a hi a thiamna avangin ‘hmarchhak Shashi Tharoor’ tia koh fo a ni a, Thawhlehni khan Lok Sabha MP atanga bângin BJP hmingin assembly inthlanpui a chuh dawn a. Himanta Biswa Sarma-a’n a awmna a sawn hnua Assam Congress atanga hruaitu lian BJP zawmtu thar ber a ni.
Bordoloi-a hian a thutlukna hi party chhunga inpawhna leh intihmualphona awm fo vang a nih thu sawiin inthlana a din leh din loh chungchang chu a ni ber lo tih sawi mah se, a hnuhnung zawk hi a chhan ber nia ngaih a ni.
Bordoloi-a hi inthlan chuh turin tih a ni tho chungin a chhuak nia sawi a ni bawk a, an party candidate turte erawh an la puang lo thung.
Bordoloi-a hian April, 2025-a amah leh party hruaitu dangte thah tumnaah a inhnamhnawih nia a sawi, Emdadul Islam-a chu Lahorighat MLA Asif Mohammad Nazar-a nen inkungkaiin a sawi a. Islam-a hi thubuai siamsak a ni a, bail-a a chhuah hnuah Nazar-a hian a dah sangviau a. Vawi tam tak chu Gaurav Gogoi-a hmaah Islam hi hmuh a ni tawh thu Bordoloi-a hian a sawi.
MP hian Gandhi-i kaihhruainaa screening committee thutkhawmah Nazar-a hi din nawntir lo turin a rawt a; mahse, New Delhi-a Gogoi-a awm laia an thutkhawmah a rawtna chu hnawl a ni tih a sawi.
Bordoloi-a hian a thu an palzut chu an party chhuahsan tura thutlukna siamtirtu a nih thu a lo sawi tawh a. A hma pawhin Nazar-a an dintir leh chuan a bân tur thu state Congress-ah lehkha a thawn tawh bawk.
Congress thuchhuah chuan Gandhi-i hian Screening Committee chairperson hna a thawh tur chu tha takin a hlen chhuak tih an sawi a. Candidate tam zawk hming hi puan a ni tawh a, Bordoloi-a fapa dintir tura tihna pawh a tel a; mahse, a pain party a chhuahsan tak avangin a pawm dawn em tih erawh hriat a la ni lo.
Bordoloi-a thutlukna chu ‘vanduaithlak’ tiin Gaurav Gogoi chuan Congress chuan engkim a pe vek tih a sawi.
“Kum hnih kalta chauh khan Congress party chuan Nagaon atanga Lok Sabha ticket chuh theihna hun remchang a pe a. Parliament-a thu a ni a; Nagaon mipuiten an vote a. Tun inthlanah hian Congress party chuan a chhungte zinga mi pakhat hnenah Vidhan Sabha inthlanah chuh turin hun remchang a pe leh a. Tuna kan Nagaon Lok Sabha Member of Parliament-ah hian Himanta Biswa Sarma hi chief minister-a awm zel tura a duh a nih chuan a thutlukna a ni a, chu thil chu a vanduaithlak hle a ni,” tiin Gogoi-a chuan Nilaini khan a sawi.
Assam-ah hian Congress chuan an hruaitu lawk tak tak chhuahsantu an nei nual a. February 22 khan Bhupen Borah-a’n a chhuahsan te, March 5 khan Congress MLA pathum chuan BJP an zawm a, Assam Congress Working President hlui, Rana Goswami-a pawhin BJP a zawm a, Assam Youth Congress President hlui, Ankita Das leh Joint General Secretary Parba Das Kalita te an chhuak bawk.
Hruaitu eng emaw zat an chân karah hian member 126 awmna rorelna ina MLA 29 nei mek party hian inthlan an hmachhawn turah hian nasa taka an beih a ngai dawn tih a lang tih politic hriate chuan an sawi.