ASSAM INTHLAN: Shah-a’n bial 90 chuang lak inbeisei

ASSAM INTHLAN: Shah-a’n bial 90 chuang lak inbeisei
Union Home Minister Amit Shah-a chuan ni hnih chhung Assam a tlawh tur tanin NDA chu he state-a assembly inthlan lo awm turah bial 90 chuang an lak theih a rin thu a sawi.
Thuthar thehdarhtute a kawmnaah, “Assam mipuite hi term thum a zawna NDA sorkartir turin an phur hle a, assembly inthlan lo awm turah bial 90 chuang kan la thei dawn a ni,” a ti.
Inrinni khan inthlan hmabak state hi tlawh tanin Guwahati-ah kawng a zawh nghal a ni.
Union home minister hian kawng zawh hi Arya Vidyapeeth College field atanga tanin khawpui chhung hmun pawimawh tak tak a paltlang a. BJP state headquarters, Atal Bihari Vajpayee Bhawan-ah party hotute a kawm bawk.
Shah-a chuan Prime Minister Narendra Modi leh Chief Minister Himanta Biswa Sarma te kaihhruaina hnuaiah Assam-ah hmasawnna lian tak a awm tawh tih a sawi a. State chhungah khawvel huap infrastructure siam a nih thu a sawi bawk.
“Assam-ah chuan kal firfiak, bomb puak leh silai hmehpuah a tawp tawh a, damdawi hmun pawimawh siam a ni a. Hmarchhak pumah hriselna leh zirna hmunpui a lo ni ta,” a ti.
Election Commission-in April 9-a vote thlak hun tur a puan hnuah state chhunga political party lian ber berte chuan inthlan campaign an bei ngawrh hlawm hle.
Assembly term liam turah BJP hian MLA 64 an nei a. A thawhpui zingah hian MLA pakua nei, Asom Gana Parishad; pasarih nei United People’s Party Liberal leh pathum nei, Bodoland People’s Front an tel.
Eptu lamah Congress-in MLA 26 an nei a, AIUDF-in 15, CPI(M)-in pakhat an nei a. Independent MLA pakhat a awm bawk.
Assam-ah hian April 9-ah vote thlak a ni dawn a, May 4-ah chhiar a ni dawn a, tun hi kum 2023-a bial ramri rin that hnua assembly inthlan lehna hmasa ber tur a ni.