Daily Newspaper

Assam lam ramri rawn nek hi MNF ministry tan a mualphothlak – ZPM Thalai

31

State pahnihin kut an thlak theih rih loh ve ve na hmuna Assam lamin dawr an sa ngam chu, eptu lam an nih laia ramri vei em emtu MNF ministry tan mualphona tawp a ni tih ZPM Thalai chuan an sawi.
Vairengte kawngthar auto stand thlanga tunhnaia Assam lamin dan loin dawr an sa tih ZPM Thalai hian sawiin, a hmuna tlawh turin Ningani khan an kal a, Kolasib district bawrhsap-in hma lak an tum dan lo hrilhin hei ngaichang rih tura a lo ngen angin, bawrhsap intiamna chu ngaihchan rih an tum tih an sawi.

ZPM Thalai president Malsawmzuala chuan, kumin February 28 khan Vairengte kawngthar auto stand bula dan loa in leh lo dinte a hmunah tlawha an kal thu leh Mizoram sawrkar pawh hma la thuai tura an lo ngen tawh thu a sawi a. Ramri humhalh tura Mizoram sawrkar hmalakna tun thlenga hmuh tur a awm lo chu pawi an tih thu a sawi.
Tunhnaiah helai hmunah bawk Assam lam atanga dawr siam a ni ta hial chu Mizoram mipui thamlohna lian takah ZPM Thalai chuan a ngaih thu leh MNF ministry tan mualphona tawp a nih thu ZPM Thalai president hian a sawi.

“MNF party hruaitute, opposition-a an awm laiin ramri vei ber ang maiin an MLA-te ramriah vawi tam an tlanthla a. Rajya Sabha MP thar ngei pawh MLA inthlan dawnah ramri venhim huamin silai pekhawm turin Zoram mipui min ngen hial a. MNF party hian ramri hi MLA leh MP tlinna atan chauh an vei em ni, tih kan zawt a. Mizoramin statehood a neih theih nan tam takin nunna hlu tak hlana, thisen leh tuarna hmanga an sualchhuah Mizoram hi, ram hruaitu inthlahdah vangin kan chan zel dawn em ni, tih kan zawt bawk,” a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy