Daily Newspaper

Assam minister pahnih lo dawngsawng turin minister pahnih

14

Assam chief minister-in Ningani hian Mizoramah minister pahnih tirh a tum a, Mizoram home minister Lalchamliana leh revenue minister Lalruatkima te chu lo dawngsawng tura ruat an ni tih thu dawn a ni.

Tun hnaia state pahnih buaina, silai hial a puahna chungchangah Assam chief minister Himanta Biswa Sarma chuan Thawhtanni khan inrem a duh thu sawiin, cabinet minister pahnih Atul Bora leh Ashok Singhal te Mizoramah a tirh tur thu a lo sawi tawh a, August ni 5 hian minister pahnihte chu Mizorama zin an tum a ni.

Mizoram sorkar chuan anmahni lo hmu turin home minister, revenue minister leh home secretary Vanlalngaihsaka te a ruat a, chawhma dar 11-a Aijal Club-a inbe tura tih an ni.

Minister Lalruatkima chuan Assam minister-te tha taka an lo dawnsawn tur thu a sawi a, rah tha a chhuah ngei a beisei thu a sawi.

Chutih rual chuan minister Ruatkima chuan Mizoram leh Assam an inbe dawn han tih hluaina tur khawp a nih loh thu a sawi a, “Tun hnaiah kan boruak a tha lo a, Assam lamin mission an rawn tir dawn a ni mai a. Miin mission rawn tirh an duh a, keini tan chuan tha taka lo dawnsawn kha kan tih tur a ni a,” tiin The Aizawl Post a hrilh.

Assam minister pahnihte hi thlawhnaa rawn kal tur an ni a, inbiak zawhah haw leh nghal an tum.

Minister pakhat zawk Atul Bora hi Assam-a an tualto party pawimawh AGP president a ni a, BJP nen sorkar an siam dun a ni.

Atul Bora hi All Assam Students’ Union (AASU) hruaitu hlui, North Eastern Students Organisation (NESO) chairman hmasa ber a ni.

Zirlai pawl hruaitu hlui, NESO chairman hlui a nih avangin MZP lam nen pawh an inhre tha a, MZP hruaitu hluite nen pawh an inkawmngeih.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy