Daily Newspaper

Assam NRC hnawl 19 lakhs te dinhmun tur chiang lo

14

National Register of Citizens (NRC) tihchhuah a nih hnu kumkhatah pawh NRC atanga paih mi 19,06,657 te dinhmun tur chu a la chiang lo zui zel thung.

Heng India khua leh tui an nihna hnawl sakte hnena hriattirna pek tur hi Covid-19 pandemic leh tuilian nasa tak Assam in a tawrh avangin tihkhawtlai a ni lo thei lo nia sawi a ni.

“Hnawl an nihna hi Covid-19 thunun a nih hma chuan pek theih a ni lo. NRC officer tam takte Covid-19 duty in an awm a, mi tlem te chauhin quality check an kalpui thei a ni” tiin State NRC coordinator Hitesh Dev Sarma chuan a sawi a, online hmanga rejection slip pek a hnawl thung.

Centre in standard operating procedure a neih ang chuan khua leh tui nihna hnawl sak chuan rejection slip a dawn atanga ni 120 chhungin Foreigners’ Tribunal (FT) hnenah a zualko thei ang tih a ni.

“NRC authority te chuan September 1 atangin district thuneitute hnenah laptops leh Internet facility an dil hnuah hna an thawh chhunzawm theih tur thu an sawi a. Pandemic thunun niin thil kalpui theih a nih kan beisei” tiin Kamal Chakraborty, Unconditional Citizenship Demand Committee, Southern Assam’s Silchar chuan a sawi.

Hetihlai hian mi thenkhatte chuan ‘illegal imigrants’ boruak chu inthlan hisapin tihkhawtlai zui zel a nih an ring thung a. NRC kalpui hmasa ber tu Congress-te chuan NRC chuan non-muslim thahnem tak a hnawl tak si avangin BJP te chu tikhawtlai zui luiah an puh thung.

“Sorkarin NRC chak takin a kalpui a, an thupui ber a ni bawk a. Mahse, BJP agenda ruk chu Bengali Hindu thahnem tak paiha an awm tak avangin lailanin a awm ta a ni. An beisei angin list a awm ta hauh lo va, hei vang hian politics a hamthatna an neih nan a issue hi rei tak awm tir an tum a ni” tiin State Congress president Ripun Bora chuan a sawi.

“Centre hian Assembly inthlan 2021 hmain engmah a tih zui kan ring lo va. Supreme Court in guidelines thahnem tak a siamte pawh an zawm hek lo, hei hian NRC emaw Assam indigenous people leh genuine Indian-te chungchang an ngaih thutak lohzia a pholang a. NRC hian illegal immigration issue hi a titawp tur asin le” tiin AASU general secretary Lurinjyoti Gogoi chuan a sawi.

AASU-te chuan sorkarin NRC a hnawlte zualkona tur FT 200 din a tum a tikhawtlai pawh an sawisel a. Sorkar chuan heng FT atan hian judge tur angin August 2019 khan mi 221 a ruat tawh a, heng mite term hi pawhsei a nih hmel loh bawk.

BJP te thung chuan Supreme Court an mawhpuh thung a. “NRC list-ah Assam-a pawl lawm an awm lo, apex court-ah re-verification tura petition a lut a, a tlem berah district-a 10% velte hming chu ennawn leh ngai a ni. Supreme Court thutlukna kan nghak mek a ni” tiin BJP thupuangtu Rupam Goswami chuan a sawi thung.

“Eng vangin nge illegal Bangladeshi te hming chuanna NRC i pawm theih ang? Re-verification 100% tih a nih theih nan ngenna kan siam a, corrupt official-te inrawlhna leh sorkar ngaihthahna a awm bawk a, a lan danah tumahin solution neih an duhin a lang lo” tiin APW president Aabhijeet Sharma chuan a sawi.

“Centre chuan heng NRC a hnawlte hi an chungchang chinfel a nih hma chuan Indian citizens an la ni reng ang a ti a. Vote nei an nihna leh an chanvo dang te laksak theih an ni lo” tiin Aman Wadud, FT in foreigner tia a chhalte aiawh advocate chuan a sawi.

Hafiz Rashid Ahmed Choudhury, chairman of the Bar Council of Assam, Nagaland, Mizoram, Arunachal Pradesh leh Sikkim chuan NRC chuan Registrar General of India in gazette notification chhuaha list a hming langte a pawm fel hma chuan NRC chuan legal validity a nei lo a ti bawk.

“A chhan chu NRC chuan dan behchhan a nei lo va, hei vang hian rejection order a tichhuak thei lo va, tumahin tun angah hi chuan an appeal thei hek lo. Tun ang dinhmunah hi chuan NRC hi a nihna takah chuan lehkha Rs 1,600 crore hu mi tam tak intihhluma siam a, mi rethei sang tam tak rethei zuala siamtu mai a ni” tiin a sawi bawk.

NRC of 1991 update hi a hmasa berin kum 1980 khan anti-foreigners Assam Agitation, All Assam Students’ Union (AASU) huaihawta neih a ni a. Kum 2009 khan NGO, Assam Public Works (APW) hmalakna in Supreme Court-ah petition thehluh a ni a, chu chuan December 2013 khan notification hmangin updating exercise neih tur a ti ta a ni.

NRC kimchang chu August 31, 2019 khan Assam Accord of 1985 angin March 24, 1971 hmalam zawnga Assam-a chengte finfiahna behchhana hmanga siama tihchhuah a ni ta a ni.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy