Daily Newspaper

Assam Police kaltlangtirtu CRPF te’n Mizo Police pui thei lo

POST NEWS SERVICE

20

July ni 26-a Vairengte daia Mizoram Police leh Assam Police an inkah khan, silaimu leng kara CRPF camp-a lut Mizo Police-te chu CRPF hian an lo pui thei lo a, an hnena awm an lo remti lo.

Nikuma ramri chungchanga state pahnih an inep khan India sorkarin state pahnih kara tla turin central armed police force a dah a, Lailapur hnaih lamah SSB, Vairengte hnaih lamah CRPF an awm. Vairengte dai auto stand thlang tlang bawka Mizoram sorkarin IR awmna tura in a sak thlangah CRPF hi an awm a, 225 battalion-a mite an ni. Chutah chuan silaimu leng karah Kolasib SP leh police dang panga an tlanlut a, CRPF hian an bula awm an lo remti lo.

Thawhtanni-a state pahnih kar a that loh zual lai khan Assam Police hian inbiak an rawt a, Assam IGP be turin Kolasib SP Vanlalfaka Ralte, 1st IR deputy commandant Bruce K Vabeirokhai leh police dang pali an kal a ni. An inbe rei viau a, Mizo IR awmna in kawta an thut laiin silai a puak ta a ni.

An awmna hmun hi khami ni-a an hmun inchuh ber kha a ni a, khami ni-a boruak tang tak rawn irhchhuahna kha a ni. Chawhma lamah Mizo police tlem azawng chauh an awm a, Assam Police rualin an luhchilh thut a, an nawrchhuak a nih kha.

Chumi hmun chu boruak tang tak irhchhuahna a ni bawk a, inkah laia hmun him lo ber lai pawh a ni hial mai thei. A lehlam lehlam silaimu dawn theihna hmun a ni a, Kolasib SP leh a hote chu a remchan dan ang anga insasengin, a thlanga CRPF awmnaah an lut ta a ni.

Mahse CRPF te chuan an hnena awm an lo remti lo a, Mizo Police te’n tute nge an nih insawiin, silai a puah avanga an hnena lut an nih thu an sawi chungin an hnena awm an remti tlat lo.

Mizo Police-te chu an chhuak leh ta a, a thlanga in sak laiah an bawk ta a ni. He in sak lai hi Mizoram sorkar sak a ni. He hmuna awm police-te chuan Assam Police tawlhkir lai an hmu pha reng a, rawn hmu fuh se chu an kir lam thinrim khan an kap mai ang tih pawh hlauhawm tak tur a ni.

Silai thawm a reh telh telh a, Kolasib SP leh a hote chu ramhnuai atangin vairengte lam panin an kal ta a, Assam Police-in an kap ang tih leh Mizo Police te’n tute nge an nih hre lovin an lo kap mai ang tih a hlauhawm ve ve ang.

A zanah SP hi Mizoram IR awmna, chhuna state pahnih police-te inchuhah khan police dangte kaihruaiin a awm a, chutih lai chuan CRPF te hi chutah chuan an kal. Sorkar laipuiin a lehlam lehlamah state police ni lo ‘neutral’ ve ve awm se, Mizo IR te awmnaah chuan CRPF awm se an tih avanga CRPF hi he hmuna kal hi an ni. An DIG hovin an kal a, mahse Kolasib SP hian hmun a lo kian duh lo.

‘Mizoram sorkarin kalsawn tura min ti a nih loh chuan kan kalsawn lo ang,’ a lo ti a, Mizo Police an duty tur thuin a lo chhang. ‘Ka career-in a tuar dawn a nih pawhin, Mizoram sorkar thu lo chuan ka chhuak lo ang,’ a ti tlat a, CRPF lam pawh chuan tihngaihna an hre lo.

Hemi zan hian CRPF DIG hnenah hian Kolasib SP hian chhuna an thil tawn, CRPF te’n Mizo Police te an lo hum duh lo a, an hnena awm an phal lo tih pawh a sawi a, DIG chuan inquiry an lo tih tur thuin a chhang tih thu dawn a ni.

CRPF te chet dan hian dem a hlawh hrim hrim a, state pahnih kar a that theih nana duty tura tih ni si, Assam Police te’n Mizoram an panna kawnga duty an ni chunga Assam Police an kaltlangtir leh, zalen taka an chettir thei khan mak tih a hlawh hle. Thuneitu sang pakhat chuan, “CRPF hi an rintlak em? Kan ring ngam dawn em tih hi i inzawt ang u,” a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy