Daily Newspaper

Assam Rifles an inluling leh – MLA Nguna

29

Tunhnaiah vawi engemawzat Mizoram chhungah Assam Rifles-te inluling taka an chet tawh hnu ah tunhnai khan Lawngtlai district lamah pawh Mizoram Police-te tham lo takin an che leh tih MLA C Ngunlianchunga chuan a sawi a. MNF sawrkar chu Mizoram Police leh mipui thlavang hauhna ngam loa a ngaih thu a sawi.

Lawngtlai West bialtu MLA C Ngunlianchunga sawi danin, September 10 zan dar 11.00 khan Mizoram Police, Sangau post-a awmten Indo-Myanmar border, Archhuangkai-ah dan loa Mizorama phurhluh kuhva rah bag 550 an man a. Dan ang taka man a nih angin, court-a thehluh tur ‘seizure list’ fel taka siam vek a ni.

Hetihlai hian heng kuhva rahte hi Siachangkawn-ah 17 Bn Assam Rifles duty-ten zing dar 1.00 velah lo man nawn lehin, Mizoram Police hnen atangin an chhuhsak a. Lawngtlai SDPO-in Bualpui OC a tir phei chungin Assam Rifles nen an inberem thei loa, Mizoram Police hi an inthiarfihlim ta zawk a, kuhva rahte pawh AR lam hian Lungleiah an phur phei a ni. He kuhva rah hi Assam Rifles man angin chanchintharah puanzar a ni zui ta nghe nghe tih MLA hian a sawi.

“MNF sawrkar hnuaiah Assam Rifles an inluling nasa hle a, Mizoram Police leh Mizo mipuite zah lo taka min palzut fo hi a pawi ka ti hle. Archhuangkai leh Siachangkawna hetianga thil a thlen hma hian Vairengte gate-ah Mizoram Police-te palzutin an lo tlantlang lui tawh a, Zokhawthar lamah Mizo sumdawngte bungrua vawi tam man sakin an lo buai phah tawh bawk. Mizoram ralmuan zia hrereng chungin rambuai ang maiin an duhna apiangah lirthei kal lai tidingin, thlabarin mipui an siam fo a ni,” C Ngunlianchunga hian a ti.

Assam Rifles-ten MNF sawrkar an ngam em em mai chu mak a tih thu sawiin, “Sawrkarin Mizoram Police leh mipui thlavang a hauh nat ngam loh vangah ka ngai. MNF sawrkar hnuaiah Mizoram Police-te zahawmna nasa taka a tlahniam ta hi a pawi ka ti takzet. Assam Rifles hian Mizoram hi rambuai a ni tawh lo tih hria se, India rama state ralmuang bera awm an ni tih inhrereng se, tualchhunga dan kengkawhtu state police-te nek loin, zah takin thawhpui tawh zawk rawh se,” a ti.

Hemi chungchangah hian kuhva rah phur lirthei khalhtute chuan Pukpuia 1st Assam rifles hmunah hren an la nih thu leh an zinga driver pahnih chu Assam Rifles te hian kut an thlak thu an sawiin an lungawiloh thu an sawi. Thudawn danin, lirthei te hi LPK truck 7 leh pikup 13 niin , lirthei khalhtute hian, lirthei hman man pe thuai tur leh reitak hreng loa chhuah thuai an duh thu an sawi tih thu dawn a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy