Assamese boxer-te an za zek zek tawh!

Assamese boxer-te an za zek zek tawh!
Assamese paliin Tata SK 710 Fight Night 3 atangin professional boxing an luhchilh dawn a, phurna sang tak nen khawtual tlangval laka hnehna banphar turin hun zanin hian tha chhawrtangkai an tum dawn.
Nizan inhnek result tarlan hman lohah Silchar fighter Arnab Chirua chuan welterweight-ah C. Lalhruaitluanga a hmachhawn a, zanin hian Dawrpui Multipurpose Centre, Aizawlah Assamese pathum an inlan ve leh ang.
Bantamweight-ah Lanz Kamei chuan tunlai Mizo boxer tha Laldinsanga nena inhnek a chak tawh tih a sawi a; kum 20 mi Sichar tlangval hian Mixed Martial Arts a khel thin a, national huanga thlenga tawnhriat nei a ni.
LPS Pro Fight flyweight champion Dinsanga’n professional vawithum a khelh tawhah a bitum a knockout vek a, Lanz chuan, “Sete Academy-ah ka awm ve tawh a, chuta tangin ka beih tur Dinsanga hi ka hria a, tha ka ti hle a ni.
“Amah nena intawn ngei ka duh tih ka thiante pawh ka hrilh tawh a, professional bul ka tannaah ka duhthusam a thleng thei tur hi ka phur hle a, mipui hmuh chak ennawm kan hlui ngei ang,” a ti.
Vawili Assam champion ni tawh Guwahati boxer Bastab Chetia chuan professional luhchilh tumin kum khat leh a chanve deuhthaw Aizawlah boxing a zir tawh a, amah ang thoa professional huanga tawnhriat la nei bik lo Siaha fighter Daniel Beipasasa nen cruiser-weight huangah an innuai dawn.
Kum 26 mi Bastab chuan, “Hun tha ka neih theih dawn avangin ka lawm a, ka chak tawh hle a ni. Hmarchhak pum thlir pawhin Aizawl hi infiamna hmunpui ber niin ka hria a, boxing chauh ni lovin infiamna dangte pawh mipuiin an hlut em em.
“Palian huangah kan inhnek dawn a, thiamna piah lamah kutthlak a na tham tawh a, tu emaw zawk chu an tlu ngei ang tih ka ring,” a ti.
2015 Pro Fight bantamweight champion HC Lalremfela’n insiamthar a mamawh a, professional a luhchilh atanga vawili a chak zawn hnuah harsatna tawkin, a inhnek hnuhnung vawihnihah a tlawm ve ve a, zanin hian Swarupam Bhattacharjee nen lightweight-ah an intawng ang.
Kum 21 mi Swarupam chuan boxing-ah chhuan tur nei lo mah se inchhuang taka Silchar-a haw ngei a tum a, “Tunge ka nih ka lantir theihna hun tha a ni a; ka beih tur Ramfela’n tawnhriat nei tha hle mah se ka hneh ngei ka ring a ni,” a ti.
Tata SK 710 Fight Night 3 khar zanah inhnek vawi ruk a awm dawn a; super fly-ah Joseph Lalremruata (Sailulak) leh Vanlalenkawltira (Champhai Dinthar), feather-ah Lalpektluanga (Darlawng) leh Lalramdinliana (Sairang Dinthar), light-ah Zonunzira (South Lungpher) leh C. Rualthankhuma (Farkawn) an inhma-chhawn dawn a ni.