Kum a thar a, kumin hi inthlan kum a nih avangin kum tir atangin political party tin maiin tan an khawh nghal phat hlawm a. Tunhma aiin tun hnuah hian rorelna In sang ber Legislative Assembly-ah thalai zawkte an lang tam chho tan ve ta deuh niin a hriat a. Amaherawh chu, India ram rorelna in sang ber Lok Sabha-a thalaite dinhmun nena khaikhin ralah chuan kan la hniam hle niin a lang.
Lok Sabha hmasa ber (1952) atanga tun thlenga Lok Sabha MP te ‘age profile’ -a a lan dan chuan, thalai kum 25-40 inkar hi 10% aia hniam (Lok Sabha 16-na tih loh), a la awm lo va. |halaite tawn san ber kum chu 1957 (Lok Sabha 2-na) kha niin 32% a kai a, hemi hnu hi chuan Lok Sabha 1-naa 26% hnuai lam a ni chho ta ngar ngar a. Lok Sabha 16-naah khan thalai kum 40 hnuai lam hi 8% chauh an tling a, Lok Sabha hnuhnung ber (2019)-ah khan 12% a rawn kai chho leh a ni.
A tlangpuiin kum 41-55 inkar an tam ber thin a, 52%-80% an tling deuh reng. Lok Sabha hnuhnung ber (2019)-a MP-te kum chawhrual (average age) kha 54 a ni a; Mizoram pawh hi tun inthlan hnuhnung bera MLA-te average age kha 54.25 a ni.
Mizoram Legislative Assembly age profile hi official taka record a lo awm a nih pawhin, tun tumah hi chuan han haichhuah mai tur hmuh remchan loh avangin, Assembly election hnuhnung ber (2018) atanga MLA age profile chhut chhuah chawp atanga a lan dan chuan, kan MLA te hi kum 25-40 inkar pathum awmin chu chu 7.5% a ni a. Kum 41-55 inkar hi 17 awmin hei hi 42.5% a ni a. Kum 56-70 hi 16 awmin chu chu 40% a ni. Hei bakah hian kum 71-100 inkar hi pahnih, (kum 74 leh 75) awmin chu chu 5% a ni bawk.
Rorel khawlah hian thalaite an inhnim phum tam ve ta deuh e kan tih mek lai hian, Lok Sabha nena khaikhin ralah chuan kan la hniam hle niin a lang. Lok Sabha-ah chuan MP te hi kum 41-55 inkar 80% te an awm thei a; keiniah chuan 42.5% te a ni a. Kum 40 chin hnuai lam phei chu 7.5% chauh an awm a ni.
Ram leh hnam kaihhruaina hna thawk turin thalaite hi ‘kan naktuk hruaitu’ turte an ni, tia a thua ram hruaitute leh a vengva chin ten thalaite politics-a an inhnim phum tam a pawimawh thu an sawi an sawi lai hian, a taka luhchilhtu erawh an la tam lo hle a, hei hi thalaiten ram inrelbawlna (politics) an ngaihven loh vang hrim hrim nge, tuna politician hlun, kum upa tawh tak takte hian thalaite hi hmun an kian phal lo zawk? tih hi ngaihtuah tham tak a ni awm e.