Assembly bial tinah BLO intuaithar mek
Mizorama Assembly constituency hrang hrang – Aizawl South II, Aizawl South III, Champhai North, Champhai South leh South Tuipui huamchhunga booth level officer (BLO) te tan training buatsaih mek a ni.
He training hi Election Commission of India-in July 2-17 inkara National Training Programme for BLO’s neih tur a tih anga buatsaih a ni a. Tun thla chhung hian Assembly bial hrang hrangah neih tum a ni a. District election officer-ten an district huamchhung theuhah training program hi an buatsaih dawn a ni.
State level master trainer-ten training hi an kaihruai anga, Mizorama BLO 1301 tana intuaitharna a nih dawn bakah India danpui leh danin a sawi anga inthlanna dik leh felfai neih a nih theihnan BLO-te pawimawhna, hnathawhna atan tangkai zawka BLO app hman dan leh electoral roll buatsaih kawnga tihsual awm lo tura BLO inzirtir tharna tur a ni.
ECI hian tun thla hnih liamta chhung khan New Delhi-a India International Institute of Democracy and Election Management (IIIDEM) ah state hrang hranga BLO thlanchhuahte tan training a lo buatsaih tawh a, hemi tum hian Mizoram atangin BLO thlanchhuah mi 40 an tel a ni.
Assembly bial tinah BLO intuaithar mek
