ATEEZ-in No.1 album an nei ve ta

ATEEZ-in No.1
album an nei ve ta
K-pop group ATEEZ album thar ‘The World EP.Fin: Will’ chu Billboard 200 (albums) chart No.1-ah a debut a, he chart-a an group album No.1 kai thei hmasa ber a ni a, he chart top 10-a an album lang thei palina a ni bawk. An album hnuhnung ber ‘The World EP.2: Outlaw’ chu kumin July thla khan No.2 a lo kai tawh bawk a ni. ATEEZ hian Billboard 200-a lang pha album hi paruk an nei tawh a, chung zingah pali chu Top 10-ah a lang thei a ni.
Billboard 200 chart hi kar khat chhunga US-a album hralh that dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te chu belhkhawm thin a ni.
‘The World EP.Fin: Will’ hi kar khat chhungin US-ah 1,52,000 an hralh thei a, chung zingah 1,46,000 chu album tak tak hralhna niin, streaming atangin 5,500 (on-demand official stream maktaduai 7.59) tlingin, album-a hla mal hralhna atangin 500 a tling thei bawk.
He album a hlate hi Korean deuh vek a ni a, kumina sap hla album ni lo he chart-a No.1 ni thei pasarihna niin, kumin chauh ni loah chuan he chart-a sap hla album ni lo No.1 thei 23-na a ni ve thung. Kumina sap hla album ni lo he chart-a No.1 tawh te chu Stray Kids ROCK-STAR, Bad Bunny Spanish album ‘Nadie Sabe Lo Que Va a Pasar Mañana’, NewJeans 2nd EP ‘Get Up,’ Stray Kids’ 5-STAR, Karol G Spanish album ‘Mañana Será Bonito’ leh TOMORROW X TOGETHER ‘The Name Chapter: Temptation,’ te an ni.
Chart top 7 a lang album dang te chu chart No.1 hlui vek an ni a, Taylor Swift ‘1989 (Taylor’s Version)’ chu 1,01,000 hralh lehin No.1 atangin No.2-ah a tawlh a, Drake ‘For All the Dogs’ chu 76,000 hralh lehin No.2 atangin No.3-ah a tawlh a, Morgan Wallen ‘One Thing at a Time’ chu 65,000 hralh lehin No.4-ah bawk a la awm a, Michael Buble ‘Christmas’ chu 60,000 hralh lehin No.9 atangin No.5 a kai thar leh a, Taylor Swift ‘Midnights’ chu 55,000 hralh lehin No.3 atangin No.6-ah a tawlh a, SZA ‘SOS’ chu 51,000 hralh lehin No.7-ah bawk a la awm.
Noah Kahan ‘Stick Season’ chu 48,000 hralh lehin No.13 atangin No.8 a kai thar a, Taylr Swift No.1 album hlui ‘Folklore’ chu 46,000 hralh lehin No.5 atangin No.9-ah a tawlh ve ta bawk.
Chart top 10 khartu chu Nat King Cole ‘The Christmas Song’ niin, 44,000 hralh lehin No.16 atangin No.10 a kai thar leh ta a ni. He album-ah hian Cole-a hla hlui te dah khawm a ni a, chung zingah chuan ‘Deck tha Halls,’ ‘O Come All Ye Faithful’, ‘Joy to the World’ leh ‘Caroling, Caroling’ te pawh a tel.