Tunhnai khan Lungleia ATM atanga mi sum lakchhuah puitu chuan bum zuiin a ATMC card a thleng sak a, sum thahnem tak a lakchhuah sak hnu ah manchhuah a ni.
Lunglei Police hotute sawi danin, 2023 February 18 khan mi pakhatin Bazar Veng Lungleia SBI ATM Booth-ah ATM a khawih thiam meuh loh avangin a bula lo awm, a hmelhriat loh pakhat chu a ATM card PIN hrilhin pawisa a lakchhuah tir a. A lakchhuahsak tupa hian pawisa leh ATM card a pek let hnu ah, ATM card neitu hi an khaw lamah a haw a. Hemi ni tlai atang hian a account atanga pawisa draw a nih thu SMS a dawng ta fo a. A ATM card an endik chuan ama ta ni loin midang ATM card a lo ni a, pawisa lakchhuah puitu khan ATM card dang daih a lo pe nia ngaih a ni. A ATM card chu block tir nghal mah se, pawikhawihtu hian Rs. 65000 a lo lakchhuahsak hman a ni.
Account neitupa hian February 25 khan Lunglei Police Station-ah FIR a thehlut a, police-ten rang taka hma la nghalin, SBI Bazar Veng Branch-a thawktute puihna nen, mi bumtu hi T Lalremruata (33) Bazar Veng Lunglei a ni tih hriatchhuah a ni. Amah hi February 27 khan man niin, a kut atang hian ATM card leh Rs.5000 hmuhlet a ni.
Hetianga mi bum tawk kan awm lohna’n mahni bank account details, ATM card leh PIN chu hmelhriat loh hrilh mai mai loin, tha taka vawnghim turin mitinte an chah tih police-te chuan an sawi.
ATM atanga sum lakchhuah danah fimkhur turin chah
