Aizawl Republic Venga ATM booth pakhat bomb nia hriat hmanga suasamtute chu police-in an chhui mek a, manchhuah an nih theihna’na thu rintlak hrilh theitu hnenah cheng sing hnih pek an tiam.
February 18 zing dar 2.50 vel khan Republic Veng Kawipuia ATM booth ah bomb nia hriat tihpuah a ni a, forensic expert ten an endiknaah gelatin nia hriat a ni. Bomb puak hian ATM a tihchhe nual a, kawngkhar darthlalang, a chhung ceiling leh electric wiring te a chhia a; pawisa dahna bawm erawh a him tih police-te chuan an sawi.
ATM booth suasamtute hian booth chhunga CCTV chu anmahni an lan theih lohna’n spray paint dumin an kap a ni.
He ATM hi NCR Corporation India Pvt.Ltd ta, State Bank of India-in a enkawl a ni a. A neitute hian Police Station-ah FIR an thehlut a ni. Mizoram Police chuan addl SP Aizawl C Laltanpuia kaihhruaina in Special Investigation Team dinin pawikhawihtute hi ngawrh takin an chhui mek a, a bulhnaia CCTV awmte leh thildang, pawikhawihtute hriat theihna awm an dap khawm mek. ATM booth chhunga CCTV thlalak pawh enfiah turin NCR Corporation India Pvt.Ltd database hmunpui Mumbai lam biakpawh a ni tawh nia sawi a ni.
He thil thlenga pawikhawihtute hriat theihna awm thu hrilhtute chu lawmmanah sumfai Rs. 20000 pek an tiam a, an nihna thup sak an nih tur thu an sawi a ni.
ATM booth suasamtute chhui
