Daily Newspaper

August 15 thleng Mizoramah force mi luh khap

41

Aizawl, August 4 : Mizorama awm para military force zingah Covid-19 kai an tam avangin 19 Thawhtanni khan chief secretary Lalnunmawia Chuaungo chuan force mi hotute hi a thutkhawm pui a. An thuchhuak angin kumin August 15 thleng chu state dang atangin Mizoramah sipai leh paramilitary force mi luh khap a ni. Hri leng dinhmun azirin an luh theih hun tur ngaihtuah that leh tura tih a ni.

Chief secretary chuan sipai zingah Covid19 darh nasa lutuk chu a rang thei ang bera tihtawp a tul, tiin, “Hmalakna pawimawh hmasa ber chu sipai zingah state leh state inkara zin veivah khap hi a ni,” a ti.

Sipaite hi unit hrang hrang inbanleta, inthlak reng an nih avang leh chhuti (leave)-a kal leh haw lam insulpel reng an nih avangin inter-state movement a nasa a, tul tawpah lo chuan hei hi khap tlat turin a hriattir.

India rama state dangte ngaihtuahin Mizoram chu hrileng lakah thui tak a la inveng thei tih sawiin, case awm mek tam zawk hi pawnlam atanga rawn lut an nih thu te, state dang aiin inkhuahkhirhna a khauh avanga inveng rih hram hram thei kan nih thu te chief secretary hian a sawi. Amaherawhchu, sipai zingah nasa taka hri hi a darh mek avangin khuahkhirh thuai a nih loh chuan mipui mimir zingah a darh hun a awm ngei dawn tih a lan reng avangin, Mizoram sawrkarin inkhuahkhirhna – SOP a duante khauh lehzuala kalpui turin sipai hotute chu a hriattir.

Mipui zingah sipai hlauhna a intuh nasat tawh avangin, langtlang taka Covid19 laka sipaiho inven dan leh an hmalak dante puanzar a tul tih a sawi a. Civil mi tangkhang sing chuang sawrkarin a lakluh zingah hri kai tlema zawng chauh hmuhchhuah an nih lai a, sipai ho zingah heti taka Covid kai an tam hi an inenkawl danah fello leh diklo a awm tih a chiang, tiin, khirh leh khauh lehzuala state sawrkar hriatpuia hma la turin a hrilh. Anmahni awmna huamchhunga local leh village level task force te nen an hmalakna inhrilhhre zung zunga inhriatpui tlang turin a hrilh bawk.

Mizoram DGP SBK Singh chuan BSF camp gate-pui pawnlamah, an camp panna kawngpui tawp zelah Mizoram Police duty an indah dawn tih thutkhawmah hian a sawi.

Sipai leh paramilitary force hotuten an hmalak dan sawiin an mi reng reng, Mizorama lokir hlim emaw awm mekte pawh quarantine an nih dan leh gate pela chhuah khap an nih dan an sawi. Assam Rifles hian Zokhawsangah quarantine centre leh CCC an nei a, Mizoram sawrkar facility-te hman ngai loin an camp-ah khirh taka quarantine an kalpui thu an sawi a. Medical thiamna bik mamawh, symptoms neite tih loh Covid kaite chu anmahni hmunah zel dahhran an nih thu an sawi. BSF hian hmun an neih that tawk loh avangin Mizoram sawrkar quarantine facility leh CCC an hmang a. Aizawla in luah leh mahni in nei sipaite pawh March atang khan BSF hmunah awmkhawmin an nupui fanaute tlawh tura chhuah pawh phalsak an ni lo, tih an sawi a. Chhuti-a kal mekte rawn haw rih lo turin engemawzat an leave pawhsei sak a, Mizorama awm mekte chhuti-a kal an khap tih an sawi bawk.

Kumin May atanga July chhung khan Mizoram Home Department chhinchhiah danin Assam Rifles 1023, BSF 648, NDRF 38, Aizawl Military Station 81, CRPF 130, BRO 204, an vaiin mi 2124 lirthei hmangin Mizoramah an rawn lut.

Mizoram sawrkar Health Department chuan sipai tan bika CCC leh quarantine centre hi dan an zawm ngei em tih an endik thin a. An hmunte a tha tawk ngei tih ziakin an certify sak bawk a ni.

CM-in force mi veivah khap rih turin PM ngen
Chief minister Zoramthanga chuan Thawhtanni khan Prime minister Narendra Modi hnenah lehkha ziakin, Mizorama Covid-19 leng darh zau zel tur ven nan state leh state inkara Central Armed Police Force te veivak thin chu August thla chhung chu khap rih turin a ngen.

Chief minister chuan tunhnaia Mizorama Covid-19 kai case thar chu a tam zawk paramilitary an nih thu leh, tun dinhmuna active case kan neih zinga 75% chu paramilitary niin, an zinga a tam zawk chu state pawn atanga tunhnaia lo lut an nih thu Prime minister hi a hrilh.

Heng avang hian paramilitary force-te hi mipui mimir natna hrik kaidarhtu an nih loh nan tul tawp thilah lo chuan August thla chhung chu state leh state inkara veivah khap rih turin a ngen a; state sawrkar chuan Mizorama BSF-te tan quarantine centre leh Covid Care Centre a buatsaih sak thu a hrilh bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy