Liverpool in Endo la lut
English Premier League club lian Liverpool chuan Stuttgart leh Japan defensive midfielder Wataru Endo chu kum li daih contract ziahpuiin an la lut.
Liverpool hian kum 30 mi Wataru Endo manah 19m euros (£16.2m) vel bawr an seng a, an player tharin work permit a neih fel hun an ngah det a ngai dawn. Reds hian nipui bazar inhawn mekah an midfielder te an chan nual a. An captain Jordan Henderson bakah, Fabinho, James Milner, Naby Keita leh Alex Oxlade-Chamberlain ten Anfield an chhuahsan. An midfielder an chhuah sup sup vangin midfielder thar lak ngei tumin tan an khawh a. Alexis MacAllister leh Dominik Szoboszlai te la lut tawh mah se an la duh tawk lo. Rawlthar midfielder lar pahnih Moises Caicedo leh Romeo Lavia te lak an tum zui leh a, Chelsea ngam lovin an la thei lo ve ve. Caicedo leh Lavia an lak theih loh hnuin Endo hi an hmutai thar a, an la lut zui ta a ni.
Liverpool midfielder thar Endo hian Japan tan vawi 50 a khel tawh a, Japan captain a ni mek. German club Stuttgard hi kum 2019 khan a zawm a, a khelh tha vangin club lian leh hlun zawk Liverpool a pan zui leh ta a ni.
August 20, Pathianni Zan
