Daily Newspaper

August 27-ah district 9-ah VC inthlan ECI roll behchhanin Tripura Bru telh

32

Aizawl, August 6 : Sixth Schedule huamchhunga village council ni lo, Mizoram district pakuaa VC inthlanpui chu kumin August 27-a neih turin State Election Commission chuan a ti a. Aizawl Municipal Corporation huamchhunga local council inthlan pawh neih a ni ang. ECI e-roll neih behchhana siam a nih vangin Tripura-a awm tawh tura tih Bru-te VC electoral roll-a awm an la awm tih an sawi.

Nilaini khan State Election Commissioner Mizoram Laima Chozah chuan inthlan hun tur hi thuthar thehdarhtute hmaah a puang a. 2015 May 7 atang khan tuna district 9-a village council term hi a intan a, AMC huamchhunga local council term pawh hemi atang tho hian a intan. VC/LC term hi kum 5 niin, 2020 May 7 kha an term tawp hun tur a ni a; Covid-19 leng vangin inthlan hun tur pangngaiah inthlan buatsaih theih a ni lo a ni.

SEC Mizoram chuan ECI-ah tun VC/LC term hi pawhsei a dil angin tum hnih pawhsei a ni tawh a, tuna pawhsei mek anga term tawp hun tur hi 2020 September 7 a ni a. Hemi hma ngei hian VC/LC inthlan hi state SEC hian a buatsaih zo fel tura ngaih a ni.

India danpui leh Mizoram sawrkarin dan a neihsa tlawhchhanin state election commissioner hian VC/LC term thar atana inthlanpui hi August 27, 2020-a neih turin a puang a. Tuna inthlan tur hi Sixth Schedule hnuaia awm autonomous district council nei Lawngtlai leh Siaha district tel loin, Mizoram district dang 9 – Aizawl, Lunglei, Serchhip, Champhai, Kolasib, Mamit, Khawzawl, Hnahthial leh Saitual ah te neih tur a ni.

Heng district 9-ah hian a vaiin VC 558 a awm a; chhungkua/in 145275 awmin vote nei 454180 an awm. General seat 1831 awmin hmeichhe tana seat hauh 633, a vaiin seat 2464 a awm a ni.

Thuthar thehdarhtute zawhna chhangin state election commissioner chuan Tripura camp-a awm Bru thenkhat Mizoram VC electoral roll-a an la awm chhan chu an roll rinpui ber, Election Commission of India-in MLA electoral roll a neih behchhana VC draft roll hi siam a nih vangin an dah ve leh mai a ni tih a sawi a. Chutihrualin VC inthlanah hian vote an thlak dawn a nih chuan, mahni sensoin Mizorama an rawn kal a ngaih dawn bakah Covid leng vanga sawrkar leh SEC-in inkaihhruaina a siam – state leh state paltlangte tan inkhunghran phawt ngai leh thildang tih ngai chu an zawm ngei a ngai dawn tih a sawi.

Hrileng mekah vantlanga a darh a, sawrkarin total lockdown a puan a ngai leh ta thut a nih chuan inthlan neih tur duanlawk chu a tul anga ennawna tihdanglam leh theih a ni tih SEC hotute hian an sawi a. Congress party-in VC leh LC inthlan hun a hrana neih an ngenna chu, ngenna an thehluh hian inthlan neih turah SEC chuan thui taka hma a lo lak tawh avangte, Covid leng mekah a ruala neih hi chhan hrang hrang vanga a that zawk vangte in tun inthlanah chuan a ruala neih tura tihtlang a nih tak thu an sawi.

Hrileng meka inkaihhruaina chungchangah inthlan buaipuitute leh vote thlaktu mipuite him tlan nan, Ministry of Home Affairs-in thupek a siam leh Mizoram sawrkarin inkaihhruaina dan a siamte zawm chungin SEC chuan inkaihhruaina (SoP) a siam tih an sawi a. Inthlan puan ni – August 5 atang hian inthlanna hmun turahte hian model code of conduct hman nghal a ni tih an sawi bawk.

Critical/sensitive polling station puan lawk a awm loa; SEC hotute chuan DC leh SP te nen an sawi ho tawhna atangin an ni hian an huamchhungah heti anga puan ngai an awm leh awm loh thlithlai chungin rawtna an siam anga bawhzui a nih tur thu an sawi.

SEC Mizoram hian Mara Autonomous District Council-a Siaha North bial by election neih hun atan August 26, 2020 a ruat tih he hunah hian a puang nghal bawk a ni.

VC leh LC inthlan tura hriat tur pawimawh

  • u Inthlan chuh tumte tan inthlan puan ni – August 5, 2020 atangin August 11, 2020 chawhnu dar 3.00 thleng nomination file theih a ni.
  • Nomination paper hi August 11 chawhnu dar 3 hnulamah endik a ni anga; scrutiny paltlangte tan inhnuhdawh theih hun hnuhnung chu August 13, 2020 chawhnu dar 3.00 thleng a ni. Hemi ni vek chawhnu dar 3 hnulamah hian candidate-te tarchhuah leh an symbol tur thlanfel nghal a ni ang.
  • Inthlan hi August 27 zing dar 7.00 atanga tlai dar 5.00 inkarah neih a ni anga; inthlan zawhah vote chhiar nghal a ni ang.
  • Inthlan that ngaihna hmun a awm a nih chuan August 28-ah neih tur a ni a; tlingte hi September 4-ah chuan executive body siamfel tawh tura tih an ni a, inthlan kaihhnawih hi September 7-ah chuan zawhfel vek tawh tura ruahman a ni.
  • Tun tuma inthlan neihna tur district 9-ah hian VC 558 a awm a; chhungkua/in 145275 awmin vote nei 454180 an awm. General seat 1831 awmin hmeichhe tana seat hauh 633, a vaiin seat 2464 a awm a. 2015-a inthlanah general-ah seat 1668 awmin tunah hian 163-in a pung.
  • Local council 83-a inthlan turah hian seat 545 awmin general 397 leh hmeichhe tana hauh 148 a ni. Chhungkua/in 69697 awmah vote nei 218758 an awm a ni. 2015-ah seat 535 awmin seat 10-in a pung

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy