Daily Newspaper

August 31 thleng inthlah zalen lo ang; Ramri, zirna in leh biak in la hawng dawn lo

48

Aizawl, August 1 : Covid-19 leng vanga ram pum leh state chhunga inkharkhip kalpui leh a hnu a inkhapkhipna tih ziaawm hnu ah Mizoram sawrkar chuan August thla chhunga kalpui dan tur a puang a. August 1 atanga 31 thleng chu inthlah zalen loa la kalpui zel a rel. Ramri khar lai mek chu khar chhunzawm a ni anga, zirna in khar ala ni ang. Biak in pawh kalpui mek dana kalpui chhunzawm a ni dawn a, thil thenkhat thlahdul hlek leh hun pawhsei hlek a awm thung.

Sawrkar laipuia Ministry of Home Affairs chuan containment zones pawn lamah inkaihhruaina a thlahdul deuh a, containment zones-ah erawh 2020 August 31 thlengin lockdown (inkharkhip) hun a pawtsei a. Tun dinhmunah Mizoramah erawh vantlanga hri darh ala awmlo nia hriat a nih rualin, rei tak inkharkhip chhunzawm hian mipuiten eizawnnaah harsatna lian tak a thlen theih vang leh nunphung pangngaia kan nun chhoh zel a pawimawh tawh a, hrileng laka mipui vantlang kan him zel dan tur ngaihtuah tel a tul tih sawrkar chuan a sawi.

Mizoram State Disaster Management Authority State Executive Committee chairman leh Mizoram chief secretary ni bawk Lalnunmawia Chuaungo chuan Section 22(2)(h) &24(l) of the Disaster Management Act 2005-in thuhneihna a pek angin 2020 August 1 atanga 31 inkara Mizorama inkaihhruaina kalpui dan tur thupek a tichhuak a ni.

Ramri – international border leh inter-state border khar mek chu khar chhunzawm a ni anga, hawnlai mek chu hawn chhunzawm zel a ni ang. Bairabi, Vairengte leh Kanhmun kaltlang kawngpuite chu Mizorama hman tur bungraw phurlut leh Mizorama thar leh siam bungrua phurchhuak lirtheite tan hawn a ni ang.

Zan lama curfew puan hun chu darkar khata thlahdul niin, zan dar 8.30 atangin zing dar 4.30 thleng a ni anga; hemi atan hian district magistrate ten Section 144 CrPC tlawhchhanin thupek an chhuah ang. Infiamna lam tournament huaihawt chu phal loh chhunzawm zel niin, a hma zawnga phal loh zingah gym chu August 5 atang hian hawn phal a ni tawh dawn thung.

Dawr, sumdawnna hmun leh eizawnna hmundangte chu a pangngaia hawn theih a ni a. Dawr zawng zawng, damdawi dawr tiam loin tlai dar 7.00 hma-in khar vek tura tih a ni.

Zirna in te khar chhunzawm tur a nih rualin, central leh state sawrkar hnuaia training institution-te chu Ministry of Personnel, Public Grievances and Pensions, Department of Personnel & Training-in office memorandum a tihchhuah hmanga SOP a siam zawm chungin hawn theih a ni thung.

Heng bak thildang erawh inthlah zalen huk loa sawrkarin inkaihhruaina a siam mekte a ngai anga hman chhunzawm a ni hlawm.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy