Sairang – Kawnpui kawng thawmthat mekah thawktuten chak zawka an thawh theihnan bungraw phur lirthei lian ho chu August 4 – 9 inkar, ni 6 an chawl dawn a, hemi chhunga siam zo turin an beisei tawh tih an sawi.
Lirtheia eizawng pawl 24 aiawh chu Ningani khan Aizawlah an thukhawm a. Hemi hnua thuthar thehdarhtute an kawmnaah an convener Robert Lalrinawma chuan, Sairang leh Vairengte inkar kawng chu tha se an duh a, kawng chhe siam hna thawktuten lirthei tangkhang tam lutukin an hna a ti chak lo nia an sawi thin avangin, tuna a tangkhang zawng zawng chu sawrkarin tunkar chhungin an panna tur lam lam pantir vek se, karleh chhung hian chak zawka kawng siam a nih theihnan lirthei tlan loin an lo nghak dawn tih a sawi.
Kumin July 21 khan an lo thukhawm tawh a, Mizoram sawrkar leh NHIDCL chu lirthei tlan nuam tawk tala kawng chhe zual thawmtha turin an phut a, an thil phut hi a hlawhtling em tih July 23 khan an endik tih a sawi. Langkaih kawng chu PWD-in an khawih a, leimin leh kawng tha lo lai an thawmtha niin an hria a, an lawm hle tih a sawi a ni.
Sairang leh Buichali inkar bik chu hmun khatah culvert tui tling, lirthei tlukna thin la siam zawh loh a awm a, tha zawka siam an duh tih a sawi. Kawng chhiat hlui, iron rod bung lawr awm nual chuan an lirthei ke a tihpuah phah fo a, rod lawr hi thenfai an duh tih a sawi bawk.
NH 6 Kolasib - Bairabi inkar, rel atanga lo thleng buhfai phurhna kawng chu a chhia siamthat ni vek lo mah se, PWD-in hma an la a, fur zawh veleh black topping pawh tih an tum thu hrilh an ni tih a sawi a ni.
Sairang- Vairengte chu kawng chhe tamna, kawng chhe lai erawh tawite ni si a ni, tiin, kawng chhia thawmtha turin thawktu an tam loa, tun aia chak zawka thawk turin sawrkar leh NHIDCL an phut tih Robert Lalrinawma hian sawiin, sawrkarin helai kawng siamna atana cheng nuai 100 a dah chu hmanraw tha chauh leinan hman an phut tih a sawi.
Lirthei tangkhang tam chhan chu traffic management chhiat vang niin lirtheia eizawng pawl hruaitute hian an sawi a. Traffic buaipuitu an tlem a, lirthei tangkhang tam chuan kawng dunga faina leh thianghlimna thlengin a nghawng si tih an sawi.
Zawhna chhangin lirtheia eizawngtu pawl ho chuan, tuna lirthei an din tir hnu ah pawh kawng chhia hi thawmthat zawh ala nih loh chuan, a hnu leh chu an che na viau tawhin an ring tih an sawi a ni.Lirtheia eizawngte thusawi dang:
8 Kawnpui – Sairang hi 2009 hmalamah single lane, 2014 ah double lane-a siam zawh niin, 2019 hnulamah mumal taka thawmthat a awm tawh lo tih an sawi.
8 Kawng chhia avang hian Mizo driver bakah state dang mi lirthei enkawltu tam tak rei tak tak an tangkhang a. Ei tur an tlachham a, damlo an awm bawk thin. Sawrkarin ruahmanna a siamsak a ngai tih an sawi.
8 Loan-a lirthei la an tam a, an tlan lo rei tawh si a, an harsat phah hle a, bank-in hrethiam thei se an duh hle tih an sawi.
8 Kawng chhe karah chirhdiak kai chungin lirthei an rawn luhpui a, Phunchawng-a weighbridge-ah chirh zawng zawng nen an lo buk tho si a. Kawng chhiat chhung chuan ngainathiamin, tlan tlang tir rih mai se, tiin sawrkar an ngen.
8 Vairengte leh Sairang inkarah kum 2024 khan lirthei chesual 104 a awm a, kuminah 49 an awm tawh. Kawngpui thawmthat a chhiat hma leh chhan ber chu side drain enkawl zui that loh vang ni ah an ngai.
8 Kawng chhe chunga lirthei an tlantir luih avangin an lirtheiin a tuar a, sawrkarin engah mah ngainathiamna a pe si lo. NHIDCL chu state dang atanga kawng siam tura rawn lut an ni mai a, kawng chhiat chhan tak chu a ram neitu sawrkar inthlahdah vang ni ah an ngai.