Daily Newspaper

August 7 thleng inkharkhip chhunzawm dawn

7

Kar khat dang insangmar leh turin mipui ngen
Covid-19 hrileng inkaichhawnna in a vawrtawp a thlen chhoh mek lai a nih avanga sawrkarin kar khat dang inkharkhip bur a rawt chu kan zavaia him tlanna tur a nih avangin mipui lam lo insangmar leh hram turin a ngen.

Health minister Dr R. Lalthangliana hoa Mizorama Covid-19 hrileng mek dinhmun thlira Inrinnia thukhawm chuan, Aizawl Municipal huamchhungah kar khat dang – August 7, 2021 zanlai dar 12 thleng inkharkhip bur chhunzawm turin a rel a. Hemi hun chhunga inkaihhruaina dan leh AMC huamchin pawn lama kalpui dan tur chu State Executive Committee on State Disaster Management Authority-in an ruahman ang a, chief minister-in a pawmpui chuan hman zui nghal tura tih a ni.

Thutkhawmah hian Mizoram dinhmun leh a bikin Aizawl dinhmun an thlirin hrileng inkaichhawnna in a vawrtawp a thlen mek lai a nih thu sawi a ni a; inthlahdul chu a rem rih loah an ngai. Hetihrual hian sample endik runpui neih mek pawh ngawrh taka kalpui chhunzawm tha an ti a. Sawrkar laipui lama Health & FW ministry hotute chuan sample endik zat atanga hri inkaichhawnna (positivity rate) zaah 10 aia sang a nihna district-ah chuan khauh taka inkaihhruaina kalpui tur a ni tih an sawi thu sawi a ni.

Mizoram Police, Aizawl khawpui huamchhunga duty-te chu ramri lamah thawnthlak deuh vek an nih avangin total lockdown kalpui chhunzawm chhung hian task force leh YMA te chu theihtawp chhuaha ngawrh taka duty chhunzawm tura ngen an ni. ‘Kan zavaia kan him tlanna tura ruahman a nih vangin mipuite chu karkhat dang lo insangmar leh hram hram turin kan ngen a; Covid Appropriate Behaviour zawm chunga sawrkar ruahmanna tha taka thlawp turin kan ngen a ni,’ he thutkhawm thuchhuak chuan a ti.

Health minister chuan Indian Council for Medical Research hotute hnenah RTPCR test kit leh a bawlhlote Mizoram tana rawn pe leh tura a ngen thu sawiin, ICMR lam chuan RTPCR test kit 20000 bakah a bawlhlo viral transport medium (VTM) leh RNA extraction kit 20000 ve ve, a vaiin cheng vaibelchhe 5 hu vel chu a thlawna an rawn pek tur thu hrilhin, karleh hian a rawn thlen hman beisei a ni tih a sawi.

Rapid Antigen Test kit chungchangah thlaphanna tur a awm loh thu sawi niin, nuai khat rawn thleng tur a awm bakah nuai hnih dang pawh order fel tawh a nih thu sawi a ni. RAgT kit man a tlakhniam zel avangin RAgT hmanga sample endik man pawh Rs. 100-a tihhniam a nih tur thu sawi a ni bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy