August thla a liam a, mi tinin ruah tui tamzia an hria ang. Ruah tui tamzia kha hai rual a ni lo a, nakinah pawha sawi chhuah fo tur khawp a tling mai thei.
State Meteorological Centre-in an chhinchhiah danin, thla liam ta August thlaah khan Mizoramah ruah tui mm 572.7 a tla a, thla khat chhunga ruah tui tla zatah hei hi a tam, August thlaa tlaah a tam!
State Meteorological Centre chhinchhiahna enin kumin August thlaa ruah tui tla zat ang kha kum dang August thlaah a tla tling ngai lo. August thlaa ruah tui tlak tam ber tum chu kumin August thla kha a ni.
Nikum August thlaah khan mm 427.1 a tla a, 2022 August thlaah mm 277.8, 2021 August thlaah mm 353.5, 2020 August thlaah mm 156.9 a tla a, kum hmasa lam nena khaikhinin kumin August thlaa ruah tui tla zat hi tam tlerh tlerh tak a ni.
State Meteorological Centre-in an chhinchhiah chinah 2010 August thlaah khan ruah tui mm 517.9 a tla a, hei hi a hma chuan August thlaa ruah tam ber tum a ni thin. 2010 August-ah bak kum dang August-ah mm 500 a tling ngai lo a, kumin August thlain a rawn khum hneh hle.
August thlaah khan ni tin deuhthaw ruah a sur; ni 5, ni 6 leh ni 29-ah chauh a sur lo. Ni 7 atanga ni 28 thlengin, ni 20 chhung ruah a sur a, ni khat a awl hnuah a tuk atangin a chhunzawm leh nghal.
August ni 31 thleng khan kuminah ruah tui mm 1941.7 a tla tawh a, nikum kum tluan khan mm 1972.8 a tla.
Ruah a tam bawk a, sikul chawlh pawh sorkarin a pung deuh malh malh; Aizawl district-ah ni 20 atanga ni 23 thlenga puan a nih hnu-ah ni 28-ah puan a ni leh a, Lunglei district-ah ni 21 leh ni 22-ah, Siaha district-ah ni 21-ah, Kolasib district-ah ni 21 leh ni 22-ah, Serchhip district-ah ni 21-ah, Mamit district-ah ni 21-ah chawlh hi puan a ni.
August thla – ruah tui tam thla
