Daily Newspaper

Aung San Suu Kyi kum 4 lung in tang turin ti

19

Myanmar special court chuan hruaitu paihthlak Aung San Suu Kyi chu buaina chawkchhuak leh coronavirus restriction bawhchhiaa puhin kum li lung in tang turin a chungthu a rel.

He hremna hi Suu Kyi in thubuai sawm pakhat lai a neih zinga pakhat chauh niin kum 76 a upa Nobel laureate hi February 1 khan Myanmar sipai te chuan an paihthla a ni.

Nikum November thla inthlanah a party National League for Democracy-te chuan kum nga dang rorel leh turin hneh taka chakna an chan chu Myanmar sipaite chuan inthlanah thil fel lo a awm tiin an paihthla a ni.

Tuna a thubuai neiha thiamloh chantir a nihna hi an party Facebook page-a a thusawi post vang a ni a. Coronavirus kaihhnawiha dan a bawhchhia an tihna hi chu nikum November inthlan dawna a campaign lai vel thil a ni thung.

Nikum inthlanah khan Myanmar sipaite thawhpui party-te chuan seat tam tak an hloh avangin sipaite chuan vote tihchingpen a nasa an ti a, mahse, independent election observer-te chuan engmah thil fel lo a awm lo an ti thung.

Suu Kyi trial hi media leh thlirtu awm phal a ni lo va, a lawyer tak ngial pawh October thla khan information pe chhuak lo tura intiamtir a ni bawk.

Suu Kyi laka thubuai siama thiamloh chantir hi inthlan awm leh tura a din theih loh nana ruahmanna nia ngaih a ni a. Constitution chuan thiltisuala puha thiamloh chantira lung in tantirte chu lawmaker an nih a khap a ni.

Sipai ten thla 10 chhung rorelna an chang tawh chung pawhin sipai rorelna duh lohna boruak a la lian hle a, Suu Kyi laka hremna hian buaina nasa zawk a thlen theia ngaih a ni.

Pathianni khan Suu Kyi chhuah zalen tura ngiatin Yangon-ah kawng zawh a ni a. Heng kawng zawhte hnawh kian nan hian Army truck tirhluh niin mi pathumin nunna an chan nia sawi a ni.

Sipai tena thuneihna an chan veleh Suu Kyi chu hreng nghalin, February 1 hnuah mipui hmuh theihin a la inlan leh lo bawk. Hetihlai hian Suu Kyi thubuai awrh pahnihna chu December 14-a ngaihtuah tura tih niin thiamloh a chan chuan kum thum lung in tan theihna a ni bawk.

Myanmar-ah sipai tena thuneihna an lak hnuah mi 10,600 chuang man tawh niin nunna chan 1,303 an awm tawh niin monitoring group Assistance Association for Political Prisoners te chuan an sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy