Aung San Suu Kyi lung inah dam lo nasa ti

Myanmar leader Aung San Suu Kyi chu damlo mekin lung in pawn lam atangin physician amah enfiah tur sipai sorkar chuan tirhluh a khap tia sawi a ni.
Kum 78-a upa Nobel laureate hi prison department doctor tena an enfiahin a awm mek a.
“A hahni a puam a, thil a ei hlei thei lo va, lu na deuh neiin a luak bawk” tia sawi niin mahse man hlauhthawn avangin a sawitu hming tarlan a ni lo.
Myanmar sipai sorkar chuan engmah sawi a la nei lo thung a. Southeast Asian ram hi kum 2021 a sipai tena Suu Kyi sorkar an paihthlak hnuah buai zui em emin mi sang tam tak te chu lung inah tantir niin nunna chan tam tak an awm tawh bawk.
Suu Kyi hi thubuai 19 awrhtir niin kum 27 lung in tang tura tih a ni a. Amah an puhna te hi inthlanna tihchingpen te, eirukna tihte niin a vaiin a hnawl vek thung.
July thla khan house arrest a dah reng a nihna atangin Naypyitaw a lung inah dah luh a ni a.
Myanmar’s exiled National Unity Government, military rule duh lo tena an din leh Suu Kyi sorkar a lo tel tawhte chuan healthcare leh security pek chu military junta te mawhphurhna liau liau tiin an sawi a.
“International community te hian Aung San Suu Kyi pawh telin politics thila lung in tantir tinte healthcare leh security tha pek an phut tur a ni,” tiin Kyaw Zaw, National Unity Government thupuangtu chuan a sawi.
Khawvel sorkar tam tak te chuan Aung San Suu Kyi leh political prisoner sang chuangte chu chhuah zalen turin an phut a, chung zingah chuan United States, European Union leh Great Britain te pawh an tel a ni.