Daily Newspaper

Australia sorkarin vaccine a thlawnin pe dawn

26

Australia chuan coronavirus vaccine beiseiawm tak pahnihte chu a tha a nih chuan vaccine dose maktaduai 85 lai nei tura inremna an siam tur thu a sawi.

Prime Minister Scott Morrison chuan an ram chuan a thlawna heng vaccine te hi mipuite hnena pek turin inremna pahnih an siam pui der tawh thu a sawi. Vaccine hi nakum January thlaa pek hman beisei niin Australian dollar 1.7 billion man hu vel a ni dawn a ni.

Australia mipui maktaduai 25 te chuan nakum January thla atangin an dawn theih beisei a ni a, mahse ‘a chiang e’ tia sawi theih engmah a awm loh thu a sawi thung.

“Inremna kan siam angin Australia chu vaccine ngahnaah tlar hmasa berah kan awm a ni” tiin prime minister chuan a sawi.

Vaccine pakhat inremna an siampui chu Oxford University leh pharmaceutical company AstraZeneca te siam niin pakhat chu University of Queensland leh CSL te siam a ni thung. Australia-ah hian coronavirus kai 26,000 awm tawhin nunna chan 769 an awm tawh a, hei hi tun hnaia Victoria state a nasa taka a hluar vang a ni ber.

Victoria state chuan Pathianni khan lockdown khauh zawkin a kalpui thar bawk a, hei hian kar hnih chhung a awh dawn a, chu mi hnuah khuahkhirhna tihnep tial tial a ni chauh ang.

Ruahmanna ang chuan Melbourne-a cheng mipuite chuan chenna In dang an tlawh emaw a huhova an awm khawm phal a ni lo va, hei hian November thla a awh hial rin a ni.

Heng vaccine tam berte hi Australia-a siam tur niin chumi a nih theih nan chuan sorkarin inremna a siampui a. Oxford vaccine siam mek hi 33.8 million dose nei thei turin inremna siam a ni a, UQ caccine hi 52 million dose nei thei tura inremna siam a ni thung niin Australian Broadcasting Corporation chuan a sawi.

Oxford vaccine hi beisei awm ber niin ruahman anga thil a kal a nih chuan nakum January leh February thlaah 3.8 million dose pek chhuah hman beisei a ni. He vaccine hi phase III test neih mek a ni tawh a, mi 30,000 ah enchhinna kalpui mek a ni. UQ/CSL vaccine hi phase I clinical trial neih mek a ni thung.

Australian sorkar chuan immunisation chu compulsory a nih loh thu leh mahse ni thei se an duh thu sawiin hei vang hian 95% vaccination kalpui a tum ta a ni.

Khawvel pumah Covid-19 vaccine ni thei tur 140 vel enchhinna neih mek niin a thente chu hmawr bawk lek lek theiin an awm tawha sawi a ni.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy