Kumin Australian Open second round hnu lama competitive match la khel zui leh ta lo Rafael Nadal chu nakkum Australian Open-ah hian khelmual lut tura a fit hman ngei a rin ngheh tlat thu Australian Open chief Craig Tiley chuan tunhnaiah a sawichhuak.
Tunhnai kum engemawti liamta chhung chu kum 37 mi Spaniard hi hliam hrang hrangin a tlakbuak chho reng a, mipa grand slam singles title lak tam lamah pawh a elpui lian ni thin Novak Djokovic chuan khi tah a kalsan tawh a, kum thar hi beiseina nen a thlir leh phawt a, January thla Melbourne Park-ah hian hmuh tur awm leh tak ang maw?
Nadal hian major singles title 22 la tling ve tawhin, chu’ng zinga pahnih chu Melbourne khuaa a hlawhchhuah hi a ni a, mahse, hliam avangin kuminah grand slam title pakhat mah a lakbelh zo ta lo a ni.
He boruakah hian nimin khan Australian Open hotupa Tiley chuan Mallorcan dinhmun tharlam sawi-chhuakin, “Rafa hian ngawrh takin training a kalpui mek a, kei pawhin nitin tih theih deuh thawin a dinhmun hi ka thlithlai reng a, a chhan pawh kan tana ngaihven loh theih loh a nih vang a ni.
“Inkhelh leh tawh a duh a, chu chu a ruahmanna pawh niin, a hma-sawnnain a hril dawn a; beiseinain karleh emaw chawlhkar hnih chhung emaw hi chuan a chungchang thuah sawichian theih kan neih tawh hmel a; he hmunah hian kan hmu ngei dawn tihah kei chu ka chiang phawt a, a chhan pawh kum hnih kaltaa he hmuna a hlawhtlinna kha chhunzawm leh ngei a duh tlat a ni,” tiin Melbourne khuaa amah bawrtu chanchinmite hmaah a sawi.
Kum 2022 final-ah khan Daniil Medvedev nen inhmachhawnin, khami tum khan Nadal chu Open era bikah set hnih hloh zet chunga Australian Open title lakir leh thei mipa zinga hmasaber a ni zui nghe nghe.
Nadal hian tour-a a season 23-na a hman zawh ruala a chawlh hma ngeiin a ropuina French Open-a vawikhat tal inlan leh a duh thu bakah nakkum Paris Olympics-ah hian Spain tana inelna hmachhawn a duh thu chu a lo sawichhuak tawh ngei mai a, vawihnih a champion ve tawhna Melbourne Park lam erawh a sawina hriat fuh tur a la awm chiah lo niin a lang!
A team lam pawhin khelmuala a kirleh hun tur hi an la sawichiang thei lo a; karliamta khan Barcelona khuaah Nadal hian a tan hun bituk a la rem rih loh tih chu a sawi thung.
“Training ka kalpui hlek hlek thei tawh a, ka hmasawnna pawh a chhe hran lo a, mahse, court chhunga ka inkhelh leh theih hun tur erawh ka hre lo a, media ka hmachhawn hnuhnunber lai ai khan a hnai tawh zawk tih erawh ka chiang. Ka kir hun tur sawi tura min duh a nih chuan ka hriat miau bik loh avangin ka sawi thei bik lo,” a ti.
Hetih lai hian Australian Open huihaitu lawk ber Tiley khan tualchhung tlangval chanchin ngah ve thei tak Nick Kyrgios pawh a home Grand Slam-ah hmuh an inrin thu a tarlang tel.
Nikum Australian Open kha khup leh banrek hliam avangin 2022 Wimbledon finalist Kyrgios hian a khel thei lo a, October 2022 Japan Open hnu lamah khan tour match khat chiah a la khel.
Australian Open-ah Nadal kan hmu dawn em?
