Site icon The Aizawl Post

Australian Open hmeichhe singles final: Rybakina versus Sabalenka

A tum hnihna atana Grand Slam final a thlenna kawngah a zawna major champion tawh pathum hneh chungin Elena Rybakina chuan nimin khan Australian Open hmeichhe singles semi-final pakhat zawkah hneh-na a chang a, naktuk, Inrinni zan hian Belarusian fifth seed Aryna Sabalenka nen Melbourne Park-ah cham-pion nih an inchuh ang.

Wimbledon champion Rybakina hian nimin last four match pakhat zawka a tumpui Victoria Azarenka lakah 7-6 (7-4) 6-3 hnehna changin, Australian Open-a vawihnih champion tawh Azarenka hian kum 10 liamtaa he title a lak hnuhnunber chhunzawm leh a tumna a puitlin zo lo.

Kum 23 mi Rybakina hi, tarlan tawh thin angin, Russia rama piang ni mah se a tennis career-ah sum lama puihna a dawn that zawk avangin Kazakhstan citizenship nen pro-fessional tennis a luhchilh ta zawk a; kumin Melbourne Park-ah hian seeded 22-na ni chungin a inlan a, 24th-seeded Belarusian Azarenka hnehin final a thleng ta a ni.
Rybakina hian nikum khan beisei loh takin All England Club-ah a grand slam title hmasaber a sualchhuak nawlh a; nikum Wimbledon kha major final a luh vawikhatna niin, tun hi grand slam final a khelh vawi-hnihna tur chiah a la ni.

Azarenka hneha final a thleng chu a hlim thu sawi chungin Mel-bourne Park boruak chu a dan daih thu leh a nawrtua tan a harsat thu a sawi a, chuti chunga semi-final a paltlang thei lawmawm a tih thu leh Wimbledon-ah khan tawnhriat a lo neih tawh thu a tarlang tel.

All England Club-ah khan mi beisei loh lutuka rawn champion nawlh ni bawk mah se he Kazakh nula hleitling zeih zawih hian Australia leilungah talent tha lutuk a kawl tih a pholang nawn leh mek a ni.

Nikum US Open khelh lai khan Rybakina hian grand slam champion nih em chu a suangtuah ngai loh thil a nih thu sawichhuakin, a chhan pawh ranking lamah world top 20 pawn lam daih a luah a, mahse, London-ah theihna a nei tih a lantir a, tunah kum 33 mi Azarenka hnehin a career-a a vawihnihna atan major final a lut leh ta a ni.

Rybakina hian last 16 lamah world number one ni lai Iga Swiatek hnawt-chhuakin, 2022 runner-up Danielle Collins leh 2017 French Open champion Jelena Ostapenko a hneh tawh bawk.

Naktuk zan final-a Rybakina hmachhawn tur fifth-seeded Belarusian Aryna Sabalenka chuan nimin semi-final dangah unseeded Pole Magda Linette chu 7-6 (7-1) 6-2-in a paltlang ve bawk.

Rod Laver Arena inkhelah hian kum 24 mi Sabalenka hi kum 30 mi ni tawh Linette lakah rinkai zawk niin, grand slam tournament bika tunhma lama third round la pel zo ngai lo Pole lakah hnehna a chang ta chiah reng a, a career-a a vawikhatna atan major final a lut ve ta hial a, grand slam champion ni tawh Rybakina lakah fiahna hautak zawk a hmachhawn leh ang.

Belarusian Sabalenka hian tunhma lamin grand slam semi-final vawithum a khelh tawhah a tlawm fai vek a, Melbourne Park-ah erawh a duhthusam leh mangphan thin tihlawhtlingin Inrinni zan final lian bik a khel thei dawn ta a ni.

Exit mobile version