Daily Newspaper

Australian state ten Sydney tlawh khap

13

Australian states leh territory te chuan Sydney khawpui luh khap hlawmin hei hi coronavirus a len nasat mek vang a ni a.

New South Wales (NSW) ramri khar a nih avang hian mi tam tak tena Krismas-a chhungkua inhmuhkhawm tuma ruahmanna an neih te chu tihtlawlhin a awm a ni.

Airlines te pawhin nimin atang khan Sydney Airport flight an titawp zui bawk a. Sydney-ah hian virus kai thar 83 hmuhchhuah tawh niin an vai hian Sydney-a Northern Beaches region kaihhnawih te vek an ni a.

Thawhtanni khan NSW state thuneitute chuan darkar 24 chhunga mi 38,000 test an neihah virus kai thar 15 an hmuhchhuah thu an sawi a.

Virus hi Northern Beaches pawnah chuan a la darh lo nia ngaihna awmin helai hmun erawh local lockdown khauh tak kalpui mekna a ni thung a. Mahse, thuneitute chuan ni khata test result maiin thil a finfiah lo an ti thung a.

“Virus inkaichhawn nasa tur kan dang ngei a, mahse, pandemic leng hi nasa thei a la ni reng a, uluk taka kan thlithlai reng a ngai a ni,” tiin Premier Gladys Berejiklian chuan a sawi a. Krismas chuan khuahkhirhna an thlah dul dawn em tih tunah chuan sawi chian theih a la ni lo tiin a sawi bawk.

Australia-ah hian tun dinhmunah Sydney pawnah chuan virus kai hmuh an la ni miah lo thung a. Hei vang hian Sydney pawna a darh loh nana khuahkhirhna khauh tak an kalpui a ni.

Sydney-ah chuan mi 10 aia tam punkhawm phal loh niin khua leh tui te chu midangte nena a tlem thei ang ber inhmu tura ngen niin hmaikawr vuah vek tura hriattir an ni bawk a. Northern Beaches huamchhunga chengte erawh nilaini thleng lockdown an ni thung.

Pathianni khan Queensland, Victoria, South Australia leh Australian Capital Territory te chuan Sydney a zin an lo khap tawh bawk a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy