Autralia-in nakkum atangin
khapna siam zawk mai thei
Australia chuan naupang kum 16 hnuailamte tana social media platform hrang hrang khapna dan an siam tum chu nakkum atanga hman tan tura rawt a ni.
Australian Senate Committee chuan thawhtanni khan hemi chungchangah hian an thutluknate parliament-ah thawnin, tunkar chhunga parliament-a hmanhmawh taka pawm aichuan nakkum lam nghah a tul tur thu an sawi.
Parliament chuan hemi chungchang hi kar hmasa khan lo rel tawhin, Senate committee kutah a dah a, ani ruahmanna siam anga tunkar hian pawm mai nise an tih laiin Senate committee lam hian ngun zawka an zirchian hnuah nakkum lam atanga dan thar chu hman nise an ti ta zawk a ni.
Australia rama digital industry X, Instagram, Facebook leh TikTok te tana hma latu Digital Industry Group Inc. managing director Sunita Bose chuan khawvela dan siam hmasa ber ram an nih dawn avangin Senate in insawifiahna nei tura a kohnaah kawng hrang hranga buaina thleng thei turte a sawi a, Senate chuan hei hi a pawmpui ta nia sawi a ni bawk.
He dan hi parliament chuan lo sawiho tawhin, tunkarah hian parliament-ah pawh sawichhuah leh ngei a nih a rinawm a, lo pass pawh nise nakkum lam atanga hman tan a nih hmel niin sorkar aiawh thupuangtu pakhat chuan a sawi zui bawk a, hman a nih hnu chuan kum tling lo hmangte chu Australian dollar maktaduai 50 thleng chawitir theih an ni dawn a ni.
Autralia-in nakkum atangin khapna siam zawk mai thei
