Avatar 3-in $1.2B la lut tawh
James Cameron film siam hit zet mai, Avatar film pathumna ‘Avatar: Fire and Ash’ chuan tun weekend kalta khan North America-ah cinema hall ticket hralhna atangin dollar maktaduai 21.3 la lut lehin, US box office-ah No.1 a la ni a, kar li chhung chu box office No.1 a ni ta.
Box office ranking hi weekend (Zirtawpni – Pathianni) chhunga US-a cinema hall ticket hralhna sum chet vela atanga tehin ranking siam thin a ni. ‘Avatar 3’ hi tun weekend kalta khan US-a cinema hall 3,700-ah an tichhuak a, heta tang hian dollar maktaduai 21.3 la lut lehin, tihian kar li chhungin US-ah dollar maktaduai 342.6 a la lut tling ta a, US pawna a lak luh nen chuan dollar tluklehdingawn 1.23 a tlin ta a ni.
Horror movie ‘Primate’-in cinema hall 2,964-a ticket hralhna atangin dollar maktaduai 11.3 la lutin box office No.2-ah a debut. He horror movie hi Johannes Roberts direct niin, ani hian horror thrillers dang ‘47 Meters Down’ te pawh a lo direct tawh a, tun tumah hi chuan chhungkaw pakhat chimpanzee vulhin a vulhtu chhungkua a beih zui tak dan vel tarlan a ni a. Oscar pawh dawng tawh Troy Kotsur channa a ni a, ani bakah hian Johnny Sequoyah leh Jessica Alexander te pawhin role pawimawh an chang. He film siam nan hian dollar maktaduai 20 vel an seng a, US pawnah dollar maktaduai 13.4 la lut bawkin, a vaiin opening weekend-ah dollar maktaduai 24.7 a la lut thei a ni.
Amanda Seyfried leh Sydney Sweeney channa ‘The Housemaid’-in dollar maktaduai 11.2 la lut lehin No.3 a la ni. He film hian US-ah dollar maktaduai 93 la lut tawhin, US pawna a lak luh nen chuan maktaduai 150 a tlin tawh a, he thriller hi a hlawhtling an tibawk a ni ang, a film chhunzawmna tur pawh an ruahman lehnghal tawh.
Animated movie Zootopia 2-in weekend vawi sarihnaah dollar maktaduai 10.1 la lut lehin No.4 a la ni a, he film hian khawvel huapin dollar tluklehdingawn 1.65 a lalut tling tawh a, Walt Disney Animation film zinga sum la lut hnem ber a la ni.
2020-a an tlangzarh ‘Greenland’ film chhunzawmna ‘Greenland 2’-in opening weekend-ah US-ah dollar maktaduai 8.5 la lutin, No.5 a ni a. He film hi Hollywood star Gerard Butler channa niin, simeikhu-in kan chenna lei a den avanga chhiatna lo thlen hnua Greenland bunker a tawm chungkaw pakhat te nun zui zel dan vel tarlanna a ni.
Box office top 10:
1 Avatar: Fire and Ash $21,300,000
2 Primate $11,300,000
3 The Housemaid $11,200,000
4 Zootopia 2 $10,100,000
5 Greenland 2: Migration $8,500,000
6 Marty Supreme $7,633,062
7 Anaconda $5,100,000
8 The SpongeBob Movie: Search for Squarepants $3,800,000
9 David $3,087,465
10 Song Sung Blue $3,000,000
Avatar 3-in $1.2B la lut tawh
