Ruihtheih thil avanga buaiten hun reilote chhunga an nghei lawkna theihna tur ang ni lo, thawhchhuah an neih theih nan centre siam chu sawrkarin a thlir a, hemi atan hian thawhpui pawh a nei thei dawn niin chief minister Lalduhoma chuan a sawi.
Mizo thalai, ruihtheih thil avanga buai, home/ centre hrang hranga a sang tel awmte chuan thawhchhuah hranpa nei loin, an nghei lawkna atan deuh heng centre hi an hmang nia lang chu a veiawm tih chief minister hian a sawi a. Tunhnaiah Presbyterian Church of America atangin Mizorama ruihhlo ngaite enkawl dan zirchiangin an rawn kal a, home/ centre thenkhat an tlawh a, hemi hnu hian Excise & Narcotics minister leh Social Welfare minister te nen thukhawmin hma lak dan tur an ngaihtuah dawn tih a sawi.
An ni hian Mizoramah hmun an neih theih chuan ‘centre’ rawn din an hreh loa, awmze neia heng hmuna awmten thawhchhuah leh a hnu zela eizawnna tur an neih dan tur inzirtirna hmun siam an duh tih a sawi. Hemi atan hian ram pe (donate) phal an awm phei chuan a lawmawm hle dawn tih a sawi a ni.
Awmze nei zawk ‘centre’ thlir
